"Ho aprovasaun ba diploma ne’e Unidade ba Planeamentu, Monitorizasaun no Avaliasaun (UPMA) halakon no substitui ho Ajénsia Nasionál Planeamentu, Monitorizasaun no Avaliasaun (ANAPMA), hanesan Servisu sentrál administrasaun direta Estadu nian, ho autonomia administrativa no finanseira”, esplika Ministru Prezidénsia Konsellu Ministru, Fidelis Leite Magalhães, iha Palásiu Governu, segunda (20/09).

Ajénsia ne’e nia misaun mak fó apoiu tékniku no administrativu ba Primeiru Ministru, iha ninia kompeténsia sira kona-ba fortalesimentu institusionál Estadu nian no kona-ba koordenasaun asaun membru Governu nian, liliu atu konkretiza objetivu no meta sira ne’ebé prevé iha Programa Governu nian.

ANAPMA iha responsabilidade atu organiza, koordena no superviziona prosedimentu no prosesu administrativu sira ba planeamentu plurianuál nian husi médiu prazu, ba períodu tinan lima, no ba monitorizasaun no avaliasaun husi ninia implementasaun.

"Ajénsia ne’e dirije husi Diretór Ezekutivu ida, ne’ebé ierarkiamente subordina ba Primeiru Ministru no koadjuva husi Diretór Adjuntu nain tolu ne’ebé responsavel ba área Administrasaun no Finansas, ba área Planeamentu, no ba área monitorizasaun no avaliasaun”, dehan nia. (*)