"Rona, katak deputadu Aniceto, ho deputadu Luís no Kalohan, sira halo viajen ba Áustria. Estadu implementa hela Estadu Emerjénsia, serka sanitária, konfinamentu obrigatóriu, ita haree povu barak halerik, hamlaha, balu tara-an, depois ita haree hanesan ne'e ita gasta osan arbiru, atu sai ba rai liur, laiha rezultadu. Di'ak lalika ba tiha de'it", hatete nia iha PN, kinta (02/09).
Nu'udar opozisaun sente hakfodak no dúvida tanba ekipa Parlamentu Nasionál liliu deputadu Aniceto Longuinhos Guterres Lopes, Luis Roberto no António da Conseição "Kalohan" tuir lolos partisipa liuhusi maneira online ka (zoom) no la presiza ba to'o nasaun Áustria.
Tanba to'o iha ne'eba, sira fila mai Timor sei lori moras mai depois aplika estadu emerjénsia, serka sanitária no konfinamentu obrigatóriu, hodi haterus nafatin povu.
Situasaun ida ne'e lolos labele akontese tanba durante ne'e povu barak halerik, hamlaha, atu viajen de'it iha rai laran mós susar ona, to'o balu tara-an, maibé ukun na'in sira gasta osan hodi viajen ba rai liur.
Bankada CNRT deskonfia, dalaruma deputadu sira ne'e laiha ona sentidu ba povu no rai ida ne'e, tanba aplika regra oioin maibé ikus sira rasik kontra.
Hatan ba kestaun ne'e, Vise Prezidente Parlamentu Nasionál, Luís Roberto hatete, ekipa PN ne'ebé desloka ba nasaun Áustria, tuir lolos deputadu bankada CNRT mós envolve.
"Bankada CNRT momentu atu ba hotu maibé la prienxe kritéria balun hanesan ba saúde mundiál ninian, tanba tuir vasina sinovac karik ida ne'e la prienxe kritéria, entaun ida ne'e mak la konsege ba", esplika nia.
Maibé kestaun konfinamentu obrigatóriu, atu limita sirkulasaun husi populasaun ne'e, bazeia ba regra saúde nian.
Tanba ne'e, ema hotu tenke asume responsabilidade, Governu kria regulamentu internál atu regula komunidade hakmatek oinsá kontribui ba saúde públika, relasiona ho volume moras ne'ebé mak aumenta maka'as.
"Ita kestiona filafali ba orgaun, ita nasaun ttimor-Leste ukun ne'e ita labele izola-an mesak. Iha situasaun ne'ebé de'it ita sempre halo bilaterál ho nasaun sira seluk. Ne'ebé karik ida ne'e importante teb-tebes atu konvida tantu orgaun Governu tantu orgaun Parlamentu, konvida kuandu importante teb-tebes atu partisipa ita sei partisipa, importante prienxe kritéria saúde", dehan nia. (*)