Vise Prezidente PN, Luís Roberto da Silva deklara, ajenda PN hodi viajen ne'e atu ba partisipa Konferénsia Mundiál nian ne'ebé sei realiza ba dala-lima iha sidade vienna, Áustria.
"Haree ba lista ne'ebé atu ba partisipa iha ne'ebá, Deputadu na'in-3. Prezidente Parlamentu Nasionál, Vise hau' rasik, ho deputadu Antonio da Conceição. E Aban dia 3 setembru ne'e atu sai husi Timor ba Malázia e depois kontinua filafali ba ne'ebá (Áustria)", informa Luís Roberto da Silva iha PN, kinta (02/09).
Maibé ekipa ne'ebé atu viajen ba Áustria, durante ne'e tuir teste swab mós rutina no loron kinta (02/09) hanesan ultimu ba teste swab, tanba presiza prienxe kritéria Organizasaun Mundiál Saúde.
Enkuantu, Konferénsia Mundiál dalima husi oradór sira Parlamentu nian, halibur barak liu iha nível reprezentasaun parlamentár nian, sei hala'o iha vienna, Áustria, iha loron 7 to'o 8 fulan-setembru tinan 2021.
Atividade konferensia ne'e, organiza hamutuk husi IPU no Parlamentu Áustria, ho kooperasaun Nasasaun Unidas nian, tanba konferénsia ne'e hanesan segimentu virtuál ne'ebé hala'o iha fulan-agostu tinan 2020.
Maibé Konferénsia ne'e sei hala'o molok Simeira ba feto no oradór sira Parlamentu nian iha loron 6 fulan-setembru no sei tuir fali ho sorumutuk Parlamentu globál dahuluk nian kona-ba kontra terrorizmu iha loron 9 fulan-setembru.
Nune'e, Oradór iha konferensia ne'e hamutuk atus-ida-sanulu (110) husi Parlamentu Nasionál iha mundu tomak, hein katak sei to'o Viena ba sorumutuk inter-parmentar eskala boot dahuluk husi kedas pandemia Covid-19 mosu.
Iha Konferensia ne'e, oradór sira sei rona husi ativista foinsa'e sira inklui Xiye Bastida, ida husi organizasaun lider ida husi movimentu Justisa klimátika Juventude nian.
Nune'e mós oradór sira Parlamentu nian hala'o kada tinan lima, atu reforsa dimensaun parlamentár governasaun globál nian. (*)