Renovasaun deklarasaun estadu emerjénsia ba dala-XVII ne’e hahú iha tuku 00:00, loron tersa 31 agostu 2021 no termina iha oras 23:59 iha loron 29 setembru 2021.
Hafoin finaliza votasaun, Prezidente Parlamentu Nasionál (PN), Aniceto Longuinhos Guterres Lopes deklara, Parlamentu Nasionál aprova pedidu refere ho votasaub nominál a-favór 38, kontra 0 no abstensaun 16.
“Projetu-lei 32/2021 pasa, nune’e, PN autoriza renovasaun deklarasaun estadu emerjénsia, ba dala-17", dehan Aniceto iha plenária PN, tersa (24/08).
Tanba ne'e, apoiu no kolaborasaun husi Parlamentu Nasionál nian ba Governu, atu esforsu luta hasoru Covid-19 no variante sira hotu inklui esforsu asegura no kombate krime organizadu iha área fronteira.
Razaun Prezidente Repúblika husu autorizasaun ba Parlamentu Nasionál tanba situasaun Covid-19 iha Timor Osidentál (NTT-Indonézia) iha konfirmadu kazu infesaun 49.527 no ema na’in-1.056 mak mate.
Iha Timor-Leste kazu konfirmadu hamutuk 3.264 no rejista ona ema na’in-49 mak mate ho Covid-19.
Entretantu médida Estadu Emerjénsia iha territóriu nasionál, parsialmente suspende sirkulasaun internasionál, liberdade sirkulasaun, direitu reuniaun no manifestasaun, liberdade kultu (culto) inklui limita no proibisaun realizasaun selebrasaun relijioza.
Nune’e mós direitu ba edukasaun inklui halo suspensaun temporária ba prosesu no atividade ensinu aprendizajen ho rejime prezensiál, direitu propriedade no inisiativa ekonómika privada.
Purtantu direitu rezisténsia sira sei impede hosi autoridade públika bainhira sidadaun sira la kumpre medida ezekusaun.
Deputada bankada CNRT, Bendita Magno, ejize Governu tenke aselera ona pagamentu ba diretu liña frente, tanba fulan-8 ona.
"Atu termina, Bankada CNRT husu ba Governu atu selu lalais direitu subsídiu ba frontline sira", hatete nia.
Xefe bankada KHUNTO, Olinda Guterres hatete, sira-nia parte sente triste tanba sidadaun liliu membru organizasaun arte marsiál kontinua viola regra estadu emerjánsia.
"Ami partidu KHUNTO triste tebes, liliu ba arte marsiál hothotu iha Timor, ami la'ós hatun, maibé ha'u ko'alia ida seluk ne'ebé mak sa'e sabuk iha ema nia rai. Kuitadu, ida uluk ema na'in-2 de'it mak tama mai Timor, covid-19 mosu, agora sa'e sabuk rihun ba rihun, atus ba atus, ne'e halo saida", dehan nia.
Tanba, iha situasuan ne'e, Sentru Integradu Jestaun ba Krize (SIJK) ho Ministériu Saúde (MS) labele halo buat ruma, bainhira Polísia la fó seguransa mäsimu.
Nune'e husu ba membru Governu, atu buka meu di'ak, tanba realidade maske serka sanitária iha, SIJK la'o nafatin, maibé fronteira ema kontinua tama sai. (*)
