"Ita iha ona populasaun 48% liu ne’ebé simu ona vasina doze dahuluk no populasaun 21% ne’ebé simu ona vasina doze daruak, iha nível nasionál, no ha’u fiar katak to’o tinan ne’e ramata, ho ita-nia ajuda, ita bele atinje imunidade grupu, ne’ebé ita hein, ne’ebé ita prevé ho valór besik 80% husi populasaun", dehan PM Taur iha Parlamentu Nasionál, tersa (24/08)
Hanesan mós, planu nasionál vasinasaun la’o ho ritmu di’ak iha munisípiu no rejiaun hothotu, liliu ho implementasaun estratéjia foun hodi foka maka’as ba munisípiu no rejiaun sira ne’ebé iha risku propagasaun boot liu, iha fronteira terrestre sira, nune’e mós iha fatin sira ne’ebé surtu ne’ebé gravé liu la’o hela.
"La’ós momentu atu hamamar medida sira, maibé mós, la’ós momentu atu lakon neon tanba Tmor-Leste iha dalan ne’ebé loos. Ita hatene katak vasina mak instrumentu efikás liu hodi prevene no kombate kazu sira ne’ebé gravé liu moras ne’e nian no ita sei kontinua aposta maka’as ba imunizasaun husi ita-nia populasaun sira iha territóriu nasionál tomak", afirma nia.
Maibé agradese mós parte apoiu parseiru sira ne'ebé durante ne'e kontribui Vasina AstraZeneca no Sinovac mai Timor-Leste hodi fó vasina ba populasaun sira.
"Ita konta ho tulun husi país amigu sira maka hanesan Austrália, Xina, Japaun, Portugál ka Nova Zelándia, ne’ebé ho laran di’ak fó mai ita vasina AstraZeneca ka SinoVac, iha momentu ne’ebé iha difikuldade boot atu hetan produtu saúde nian sira iha nável internasionál", dehan nia.(*)
