"Ami agradese liliu ba kontributu husi Auditória Sosiál sidadaun sira-nian, husi Organizasaun naun Gernamentál sira ne’ebé liga ba FONGTIL no husi Prokuradoria Direitu Umanu no Justisa (PDHJ) ne’ebé, husi kedas inísiu pandemia ne’e nian, ajuda ami atu hadi’a sistema atendimentu no rezultadu sira ne’ebé hetan ona husi ita-nia país”, dehan PM Taur Matan Ruak iha Parlamentu Nasionál, tersa (24/08).

Tanba ne’e, Governu sei hadi’a di'ak liután kona-ba atendimentu atu hadi’a kualidade servisu kuarentena nian no distribuisaun iha tempu pandemia Covid-19 nian.

"Loos duni katak ita sei iha buat barak atu hadi’a liután, kona-ba kualidade serbisu ne’ebé presta ona iha sentru sira kuarentena nian, kona-ba serbisu saúde nian, kona-ba aprovizionamentu, distribuisaun no armajenamentu ekipamentu saúde, medikamentu ka vasina nian sira”, afirma nia.

Diretór Ezekutivu Forum Organizasaun Non Governamental Timor Leste (FONGTIL), Daniel do Carmo hatete, ne'ebé antes ne'e rekomendasaun liuhusi relatóriu monitorizasaun daualu nian katak presiza kria kondisaun ba ema ho Difisiénsia sira no mós halo kampaña vasinasaun nian iha terenu liliu iha suku sira.

"Presiza hasa'e rekursu hodi kobre fatin dodok sira, atu halakon rumoris sira no tau konfiansa ba Governu no pesoál saúde sira inklui mós halo kompleta fasilidade saúde nian liliu kona-ba ijiene nian iha Munisípiu to'o suku sira”, dehan Daniel do Carmo. (*)