Kongresu Nasionál Partidu Frente Revolusionáriu Timor-Leste Independente (Fretilin) tuir planu sei realiza iha tinan 2021, José Augostinho Sequeira ‘Somotxo’ sei sai hanesan kandidatu Prezidente Partidu pakote hamutuk ho Rui Maria de Araujo, hanesan Sekretáriu Jerál Partidu.

"Konserteza ke dehan forma pakote ne'e, ami na'in-rua doutór Rui, ne'e mak fó sai ona ba públiku ne'e”, dehan Somotxo iha PN, kuarta (18/08).

Ho formasaun pakote atu avansa ba kongressu partidu Fretilin tanba hakarak loke dalan ba demokrasia iha partidu laran.

"Ne'e dehan demokrasia, tenke iha pakote, e ohin loron ne'e demokrasia iha Timor laran ne’e se mak permanente iha ninia fatin, ou aban bainrua to'o mate laiha, demokrasia ne’e másimu tinan 5 ou tinan 10. Ne'e mak ha’u loke dalan ba demokrasia, iha partidu laran”, afirma Somotxo.

Tanba, demokrasia ne'e tenke iha pakote, sai hanesan faze dahuluk, depois bele avansa ba Kongressu ne’ebé sei la'o tuir rejimentu partidu nian.

Maske, pakote ida ne'e, dadauk fó sai ona ba públiku, maibé seidauk bele ko’alia buat ida ba públiku tanba kongressu seidauk realiza.

Ho pakote ida ne'e sai hanesan intensaun polítika ne’ebé forma husi Somotxo no doutor Rui, para konkore ba kongressu ne’ebé sei akontese iha tinan 2021.

Vise Prezidente Fretilin, Francisco Miranda Branco konsidera, pakote ne’ebé estrutura partidu Fretilin balun halo atu avansa ba kongressu ne'e normál.

"Ha’u hanoin forma pakote ne'e la'ós problema, Fretilin dala ida tan, hanorin demokrasia, ida ne'e mak Fretilin hakerek istória iha prosesu demokratizasaun iha ita-nia rai, ne'ebé ne'e normál”, hatete nia iha Parlamentu Nasionál, tersa (17/08).

Tanba, prova demokrasia iha partidu laran, dala barak iha presepsaun ne’ebé negativu de'it husi entidade ne’ebé dehan partidu ne'e ditadura, no radikál liu, maibé primeiru partidu ne’ebé mosu hatudu dehan demokrasia funsiona. 

"La'ós de'it demokrasia iha estadu maibé demokrasia mós iha partidu sira. Tanba partidu sira ba hola parte iha funsionamentu iha estadu demokrátiku ne'e”, dehan nia.

Maibé prosesu kria ajenda ba Kongressu sei liuhusi faze, re-estruturasaun iha baze ninian, hahuú husi Suku mai Postu Administrativu no Munisípiu, no ikus liu iha nasionál.

Bainhira restrutura hotu ona membru sira iha baze, hafoin Komité Sentral Fretilin presiza reuniaun, depois define ajenda ba kongressu nasionál.

"Ida ne'e iha prosesu nia laran, e ha’u hanoin tenke ser iha tinan ida ne'e nia laran”, deklara nia. (*)