“Husu atu servisu ho profisionál hodi garante kredibilidade integridade no responsabilidade, serbisu iha rádiu komúnidade ne'e, konteudu mak ne'e, tenke hakerek di'ak, atraiante (atrai) ema maibé tenke ho responbilidade”, dehan Ministru Francisco Martins iha Gabinete MAPKomS, Palásiu Governu, segunda (16/08).

Maibé enkoraja nafatin rádiu komunidade sira atu nafatin servisu ho di'ak hodi hakat ba oin ho situasaun saida de’it mak hasoru.

“Bainhira ha’u ba vizita rádiu komunidade lubuk ida, ha’u hatene sira iha situasaun ne'ebé difísil no difikuldade barak mak sira hasoru, maibé ha'u hakarak oinsá mak rádiu komunidade ne'e atu dezenvolve-an nafatin, iha ida-idak nia fatin no ida-idak nia sidade ho ezisténsia rádiu ne'e”, dehan nia.

Tanba ne’e, Governu sei buka dalan hodi bele hala'o no halo di'ak, maske la'ós diak liu maibé oinsá bele fó sustentabilidade ba rádiu komunidade iha Timor laran tomak.

“Problema primeiru ne'ebé ita hothotu tenke hanoin hamutuk mak oinsá rádiu komunidade sira bele ajuda fó informasaun no transmite informasaun ne'ebé di’ak ba prevensaun iha komunidade nia leet”, afirma nia.

Rádiu komunidade mós iha kna'ar, atu fó informasaun ne'ebé lós no hato'o saida mak akontese iha suku atu iha nível nasionál, bele foti solusaun no foti desizaun hodi solusiona problema.

“Governu sei la taka matan ba ita-boot sira, no haree nafatin ba buat sira ne'e, no fó asisténsia ba ita-boot sira-nia rádiu hodi sustenta nafatin ho di’ak tan ne'e servisu ho didi’ak atu komunidade nafatin kalma maske iha situasaun difísil nia laran”, deklara nia. (*)