Tempotimor (Dili)-Ministru Asuntu Parlamentar no Komunikasaun sosiál (MAPkomS), Francisco Martins Jerónimo halo sosializasaun kona-ba prosesu instalasaun sistema Dijital Transmisaun Multimedia Terrestre (DTMT) liuhusi Rádiu Televizaun Timor-Leste, empreza públika (RTTL.Ep) iha postu administrativu Metinaru, Munisípiu Dili:

"Tanba durante ne'e RTTL.EP sei uza sistema Analog maibé iha Oitavu Governu Konstitusionál ida ne'e hakarak halo transformasaun ba sistema dijitál tuir plataforma moderna ne'ebé mundu adopta ba daudaun ne'e hodi garante kualidade informasaun ba povu husi nivel nasionál to'o iha baze”, dehan Francisco Jerónimo iha Salaun administrasaun Metinaro, segunda (02/08).

Tanba ne'e Governu halo esforsu tomak atu fornese informasaun sira ne'e to’o iha baze atu nune'e fasilita komunidade sira no la presiza atu sosa tan parabola.

Bainhira sosa parabola nia kustu boot tebetebes mak Governu ho ninia programa ida ne'e hakarak oferese gratuita ba entidade hotu ba faze primeiru nune'e metinaru mos hola parte ba ida ne'e.

Iha fatin hanesan Administradór Postu Administrativu Metinaro, Fausto Soares Dias, agradese ba MAPKomS, tanba bele marka prezensa hodi halo sosializasaun kona ba prosesu Instalasaun SDTMT iha matinaro, nune'e mós bele ajuda ona komunidade sira oinsá bele asesu ba informasaun iha RTTL EP

“Agradese wain ba oitavu Governu konstitusionál, ne'ebé liu husi MAPKomS hodi prioritiza ona postu administrativu metinaro hodi halo sosializasaun programa sistema dijitalizasaun RTTL.E.P, nia iha Metinaro”, dehan nia

Entretantu partisipa iha Atividade sosializasaun ba instalasaun sistema Digital Transmisaun Multimedia Terrestre ne'e, prezidente RTTL,EP, prezidente Tatoli,IP, prezidente TIC, Prezidente Telemor, Komandante Interinu PNTL Dili, Eskuadra PNTL Metinaru, Diretór Planeamentu no Diretór DNDI, Xefe suku no xefe aldeia no entidade relevante sira seluk. (*)