Sektretáriu Estadu Juventude no Desportu, Abrão Saladanha "Nokosiku" hatete, formasaun ba joven sira ne'e inportante, tanba ema ne'ebé atu hala'o servisu iha mundu turizmu liliu iha área ospitalidade nian presiza iha koñesimentu.

Tanba ne’e, Comoro Child and Youth Center (CCYC) servisu hamutuk ho East Timor Development Agency (ETDA) eskolla ona joven hamutuk 40 husi sentru formasaun juventude munisípiu 7 inklui Dili hodi tuir formasun durante fulan-tolu.

“Ita prepara hela fó formasaun ida ne'e, e ita eskolla joven sira husi sentru juventude sira munisípiu, hamutuk 7 inklui Dili, ita fó fiar ba ETDA mak halo formasaun ida ne'e ba sira”, hatete Abrão iha edifisiu ETDA, Fatuhada, segunda (19/07).

Haree ba setór turizmu iha Timor-Leste sai nu’udar oportunidade ba joven sira atubele kria empregu ba sira-nia an, tanba situasaun agora joven barak.

Hoi da ne’e, governu define setór produtivu hanesan prioridade ba dezenvolvimentu ekonomiku, no sei ko’alia liu-bá dezenvolvimentu turizmu, agrikultura inklui setór primáriu iha rai laran.

Maibé, atu dezenvolve presiza ema ne'ebé iha koñesimentu, tanba ne'e governu rekoiñese katak foinsa’e sira barak mak seidauk iha koñesimentu naton atubele serví setór sira liliu ospitalidade, turizmu.

Tanba koñesimentu tékniku ko’alia liuba tein no prepara fatin ne'ebé di’ak, mak sei presiza tebes joven sira atu aprende.

“Ida ne'e mak razaun husi programa ida ne'e atu prepara ita-nia rekursu umanu, joven sira atu koiñese skil (koñesimentu) sira ne'e hodi partisipa iha dezenvolvimentu setór importante ida ne'e”, hatete nia.

Bazeia ba relatóriu sentru juventude, valór orsamentu ne'ebé aloka ba atividade formasaun ne'e ho totál hamutuk rihun US$40-resin. (*)