Iha Kampaña ne’e, Ministru Asuntus Parlamentares no Komunikasaun Sosiál (MAPKomS), Francisco Martins Jeronimo no Ministériu Saúde liliu Koordenadór Jerál covid-19, Odete da Silva Veigas, hamutuk ho Organizasaun Mundiál Saúde iha Timor-Leste (OMS), Arvind Mathur, fahe informasaun ba Komúnidade Sira iha suku Fatubossa, postu administrativu Aileu vila, munisípiu Aileu.

Tanba ne’e, MAPKomS, Francisco Martins Jerónimo, husu komúnidade iha suku refere atu labele fiar informasaun falsa ne'ebé espalla iha mídia sosiál.

Ho kampaña sensibilizasaun ne'e atu partilla informasaun kona-ba importánsia husi vasinasaun Covid-19 hodi enkoraja no konsensializa komunidade atu tuir vasinasaun nune'e bele prevene propagasaun vírus mortál ne'e.

Husi vasinasaun COVID-19 ne'e bele hasa'e imunidade komunidade nian hodi prevene infesaun moras kontajioza.

“Kampaña sensibilizasaun ne'e mós halo atu kombate informasaun falsa,ne'ebé espalla iha mídia sosiál, tanba agora ne'e ema uza identidade (ID) falsu hodi espalla informasaun tuir sira-nia hakarak relasiona ho pandemia Covid-19”, dehan Ministru Francisco  Jerónimo, iha Suku Fatubossa, Postu Administrativu Aileu vila, munisípiu Aileu, sábadu (17/07).

Iha fatin hanesan Reprezentante Organizasaun Mundiál Saúde iha Timor-Leste, Arvind Mathur hatete, hanesan OMS nia papél importante no serbisu OMS nian atubele hetan vasina no fó ba komunidade atu proteje-an.

Nune'e vasina ba covid -19 ne’e ba populasaun ho alvu mak hanesan idozu sira ne’ebé ho idade 60 ba leten, ema ne’ebé ho moras,ema ne’ebé iha liña frente no ba populasaun jerál ne’ebé husi idade 18 ba leten

"Tanba ne'e  husu ba komunidade atu labele fiar informasaun falsa sira ne'ebé espalla husi ema ne'ebé uza identidade falsa iha mídia sosiál ne'ebé iha intensaun atu estraga ema ninia konsiénsia”, dehan nia.

Nune'e OMS hamutuk ho MAPKOMS no MS mai fó informasaun ne’ebé mak loos nomós hakarak asegura nafatin katak vasina ne’ebé sei admistra ne’e liuhusi ekipa saúde nian, no vasina ne’e nia kualidade di’ak efetividade di’ak no seguru ba ema hotu.

Entretantu Koordenadór Jerál covid-19 MS, Odete da Silva Veigas, husu komunidade sira iha suku refere  atu partisipa iha programa imunizasaun contra covid-19 nia.

Tamba vasinasaun COVID-19, bele hasa'e imunidade komunidade nian hodi prevene infesaun moras kontajioza ne'e.

Nune’e mós Administradór Munisípiu Aileu, Abel da Conceição, apresia no agradese ba Governu no OMS ne’ebé hakat to'o iha komunidadr nia fatin hodi fahe informasaun kona-ba prevensaun COVID-19 liuhusi vasinasaun nian. (*)