“Liafuan kona-ba matan delek, aproveita oportunidade ida ne'e, ha’u hakarak husu deskulpa ba maluk hothotu. Tanba iha tempu ne'eba, ha’u ho emosaun, ha’u le hela ami-nia kandidatura prezidente repúblika ninian iha hau-nia whatsapp ne’ebé ema trata at los, ema hatun at los, ha’u sei hela ho emosaun ida ne'e, mak mídia sira mai halo entrevista ba ha’u, e ha’u ko’alia duni. Iha momentu ne'eba ha’u foti ezemplu de'it maibé ha’u-nia liafuan mak naksalak”, deklara Olinda iha plenaria PN, segunda (12/07).
KHUNTO rekoinese erru ida ne'e maibé iha mundu ne'e, ema barak matenek liu mós la perfeitu, tanba balun mós ko’alia ho emosaun.
Tanba ne'e, KHUNTO aproveita oportunidade liuhusi plenária hodi husu deskulpa ba maluk sira ne'ebé ho defisiensia Timor-Leste laran tomak.
Antes ne'e, Diretór Ezekutivu Asosiasaun Halibur Defisiénsia Timor-Leste (AHDMTL), Gaspár Afonso, husu Xefe Bankada KUNTHO, deputada Olinda Guteres, atu ko’alia sukat ibun bainhira halo konparasaun liga ba ema ho defisiénsia matan.
“Husu ba señora Olinda ba futuru atu halo esteitmentu ruma, tenke tetu no analiza, sukat didi’ak linguazen hirak ne'e labele fó sai buat arbiru. Ami tauk de'it mak ami defisiénsia fíziku, mais ita-boot (deputadu) sira defisiénsia ho fuan konsiénsia ne'e mak perigu liu, ne'e atu lori los povu ne'e nia sofrimentu ba ne'ebé”, hatete nia iha salaun FONGTIL, kaikoli, sesta (09/07).
Tanba diretu ema defisiénsia ho matan iha 14,828 husi totál defisiénsia iha Timor hamutuk 38,118 ne'e, la'ós ema oituan, sira mós sidadaun, ne’ebé konsagra iha konstituisain RDTL, artigu 21 no artigu 16. (*)
