Totál husi membru komisaun hirak ne'e mak hanesan, Peskizadór na’in-15, hakerek na’in-13, Pontu vokál na'in-9, no kontribuiente na’in-54, inklui ekipa péknika na’in-2.
Distribuisaun ne'e sai hanesan rekoiñesimentu ida ba sira-nia obra ka valor servisu hodi rekolla istória kona-ba "Buibere Hamrik Ukun Rasik An" ne'ebe konsege realiza hetan lansa husi Prezidente Republika (PR), Francisco Guteres ‘Lú Olo’, iha loron 10 junu tinan 2021.
Sekretáriu Jerál Interina OPMT, Florentina Smith hatete, tuir konvite ne'e lolos membru hamutuk atus-ida-resin mak atu simu sertifikadu ida ne'e, maibé balun la mai, entaun sertifikadu ne'e distribui de'it ba sira 93 ne’ebé mak konsege marka prezensa iha serimonia agradesimentu.
“Membru ne'e, tuir ami-nia konvite ema atus-ida-resin, maibé tanba balun la mai, e sira ne’ebé mak la mai ne'e ami rejista hela, e komisaun organizadór sei lori iha tempu badak hato'o ba sira na’in ida-idak para simu sira-nia sertifikadu”, dehan nia iha serimonia agradesimentu ne’ebé realiza iha Sentru Nasional Chega (CNC) sábadu (10/07).
Enkuantu Comissão de Pesquisa de Elaboração da Historia da Luta da Mulher Timór (CPEHLMT), ne'e hari’i iha tinan 2010, no iha tempu ne'eba sira hahú reuaniaun hodi hato'o proposta ba governu inklui entidade kontribuente sira hodi apoiu orsamentu.
Ho ida ne'e, CPEHLMT konsege rekolla orsamentu ne’ebé apoiu husi governu nomós entidade kontribuiente sira hamutuk rihun US$5,440,544.
"Sim, orsamentu ne'e, ami hahú komisaun ne'e iha 2010, e depois ami hahú halo reuniaun tur hamutuk, e ami konsege hatama proposta ba governu, ba mós iha entidade sira seluk kontribuienti sira. Valor orsamentu ne’ebé mak ami konsege rekolla hamutuk mill 5,440,544 dolar amerikanu”, hatete nia.
Husi valor orsamentu ida ne'e, mak ohin (10/07), komisaun mós hato'o ona relatóriu kona-ba ezekusaun, nomós hato'o dadauk ona ba entidade sira, no falta de'it relatóriu ikus mak ida lansamentu livru nian iha loron 10 fulan-juñu.
"Sei kontinua tan ba ohin serimonia de agradesimentu ne'e, e OPMT ho komisaun peskiza da elaborasaun luta da istória mulher de timor ami sei konklui ami-nia relatóriu tomak iha tinan ida ne'e”, afirma nia. (*)
