Prezidente Komisaun Reguladora Arte Marsiál (KRAM), Octaviano da Conceição hatete, rona lideransa komunitáriu sira-nia ideia bazeia ba Governu ne'ebé hamosu lei atu nesesaria ba atividade arte marsiál hodi sai nu'udar dezenvolvimentu desportu nian.

“Atividade ida ne'e rona liu lideransa komunitária sira-nia hanoin oinsá mak Governu bele hamosu lei sira ne'ebé nesesáriu ba atividade arte marsiál iha nível suku nível komunitária atubele lori joven sira ne'ebé prátika arte marsiál ba dezenvolvimentu desportu ninian”, dehan Octaviano iha salaun Luz Clarita, Lesidere, sesta (09/07).

Nune'e Xefe Suku Mascarinas, Rei Elidio Araujo hatete, sira rona opiniaun husi membru Governu no kompaña sira hodi troka ideia kona-ba oinsá atu kontrola arte marsiál ba hala'o nia serbisu iha terenu.

“Ha'u hanoin agora dadaun ne'e ami mai rona konsultasaun oinsá mak kompaña fó hanoin ba xefe suku, no xefe suku fó hanoin ba kompaña atu haree buat sira ne'e hotu hanesan ohin ha'u dehan tiha ona kompeténsia tomak ne'e iha lideransa tanba kbi’it tomak atu regula atu kontrolu estabilidade suku ne'e xefe aldeia no Xefe suku tanba iha mós membru Polísia Nasional Timor-Leste ne'ebé mak tau nia ekipa OPS (Ofisiál Polísia Suku), ami bazeia ba ida ne'e”, dehan nia.

Mekanizmu kontrolu ne'e KRAM iha kompeténsia rasik husi Lei 5/2017 kona-ba fiskalizasaun atividade arte marsiál nian, nune'e mosu infrasaun ruma komete husi arte marsiál balun sei regula ho kontrola lei sira ne'ebé Governu sei halo. (*)