Tanba dezde tinan 2013 envolve-an iha kooperativa kréditu ne'e, nia sente hetan ona benefísiu barak no nia rezultadu hatudu progresu ne’ebé di’ak.

“Benefísiu ne'ebé mak durante ne'e ha'u hanesan membru ida husi RADIFU, maibé membru ida ativu tebes. Ha'u durante sai membru, ha'u kontente, ohin loron ho emprestimu, ha'u bele dezenvolve ha'u-nia moris. Husi inisiu, ha'u-nia moris ita bele konta, dadersan, meiudia ho kalan atu hán mós susar. Maibé, ho emprestimu ida husi RADIFU, ha'u bele dezenvolve, ha'u bele hatete katak iha Ainaru, ha'u fó ezemplu di'ak ida ba membru hothotu”, haktuir Vitórino iha salaun enkontru Postu Administrativu Ainaru Villa, sesta (09/07).

Tanba entre membru sira iha CU-RADIFU, nia mak ema halo emprestimu barak liu, maibé osan hirak ne'e nia konsege transforma moris família nian tuir nesesidade kada loron.

“Iha ne'ebá, la sala, ha'u mak empréstimu barak liu, depois ho emprestimu ida ha'u bele dezenvolve ha'u-nia moris iha família. Ha'u durante ne'e, loke farmásia klinika ho loja Zumaina iha Ainaru, liuhusi kreditu, dezde tinan 8 ona”, dehan nia.

Ho kooperativa ne’ebé iha mak to'o ohin loron nia bele foti osan hodi hadi'a ninia moris família nia.

"Ida ne'e mak ha'u hatete katak liuhusi emprestimu sira ne'e halo moris ba ha'u-nia moris lorloron. Sé ha'u la kréditu, ha'u labele moris, tan dalan seluk laiha para ha'u atu buka osan. Jurus ne'ebé hetan mak prusentu 2 (2%)”, esplika nia. (*)