Bainhira ezisténsia hanesan kooperativa kréditu husi membru na'in-17 hodi bele rai no foti osan, iha Aldeia Mulo, Suku Mulo, Postu Administrativu Hatubuiliku, Munisípiu Ainaru.
Tanba ASKODE, akumula grupu produtór hamutuk 17, grupu 15 hala'o atividade kréditu no ortikultura, hakiak ikan, maibé iha grupu rua mak hari'iindústria hodi hala'o atividade resiklájen transforma lixu sai fali matérial seluk ne'ebé bele uza tuir nesesidade.
“Ami iha grupu ida naran ASKODE ne'e, iha grupu balu atividade mak halo resiklájen, oinsá atu redúz zero plástiku. Entaun, iha ami-nia grupu ida ne'ebé mak halo fali husi sasán lixu sira hanesan plástiku, husi supemie kulit, kafé kulit, husi mós ale-ale sira-nian ne'e, hodi transforma filafali ba hanesan pasta, hena-meza nomós iha Lohu”, informa Koordenadór ASKODE, Hipólito Alves dos Santos, iha Ainaru, kinta (08/07).
Inisiativa halo atividade resiklájen ne'e, tanba hahú ho programa governu nian liuhusi Sekretáriu Estadu Ambiente (SEA), ho polítika “Zero plástiku”.
“Tanba TL seidauk iha indústria ida ketak atu halo jestaun ba sasán sira ne'e, entaun grupu ne'e inisiativa transforma ona lixu (foer) sira ne'eba sasán sira hanesan pasta, hena meza, lohu, so ke problema maka asesu ba merkadu ne'e seidauk iha”, dehan nia.
Maibé prezensa SEKoop nian ne'ebé atu hari'i loja kooperativa ida iha Ainaru, fiar katak bele akumula (halibur) produtu sira atubele asesu ba merkadu.
“Liliu ami sujere katak polítika sira hanesan ne'e labele iha planu de'it, mais ami hein iha asaun para bele iha realidade ba implementasaun”, dehan nia.
Liga ba kooperativa kréditu ne'ebé foin ezisté fulan tolu, hahú iha fulan-marsu to'o juñu 2021, grupu ASKODE akomoda ona kapitál finanseira hamutuk rihun US$1,158, ne'ebé mai husi membru permanente 17, enkuantu membru privizóriu ka indireta, hamutuk ema na'in-99.
“Ami-nia grupu primeiru ne'ebé eziste ne'e mak, ami-nia grupu ASKODE ne'e, iha inísiu kona-ba kréditu osan depois ita loke luan tan ba setór sira seluk hanesan ohin ha'u temi dadauk ne'e”, informa nia. (*)
