Iha despede atletas no ofisiál ba Jogu Olímpic ne'ebé sei realiza iha Japaun. Tanba jogu olimpiku 2020 sei hala’o loron sábadu 24 fulan-jullu to’o 9 fulan-agostu 2021.

Jogu olimpiku ne’ebé Timor-Leste sei partisipa hanesan eventu internasionál ida ne’ebé mai ho modalidade oioin hala’o iha sidadde Tokio, estádiu Nasionál Japaun ho nasaun ne’ebé partisipa kuaze liu 206 (estimadu) iha mós eventu kuaze 306 (estimadu).

“Ita-Boot sira-nia partisipasaun Jogu Olimpiku iha Tokiu fó ona orgullu no onra boot ida ba ita-nia nasaun. Prezidente Republika hein katak ita-boot sira bele hatudu ba mundu katak, nasaun ki'ik ida hanesan ita-nian, bele mós kompete iha nível internasionál. Karik Ita-Boot sira manán medalla ruma, sei fó onra boot liután ba TimorL-este, maibe tuir Pierre Coubertain hatete importante liu la'ós manán, maibé kompete ho dignidade. Ha'u-nia votu susesu ba imi hotu”, dehan nia iha Palasiu Prezidensial bairo-pite, sesta (09/07).

Iha sorin seluk Sekretáriu Estadu Joventude no Desportu, Abrão Saldanha hatete, atu manán ka lakon Timor-Leste tenke partisipa tanba sai ona nu'udar membru Komité Olímpiku Internasionál mesmu hasoru difikuldade barak.

“Ita-nia desizaun obriga atu ba partisipa iha jogu olímpikus ne'e hanesan obrigasaun ida husi estadu membru ba komité Olímpiku internasionál liliu atu hatudu ita, mezmu iha difikuldade oioin iha Pandemia no dezastre naturál maibé ita hanesan povu ita iha esperansa ita hatudu ita-nia ezisténsia ita-nia rejilénsia iha situasuan difísil bele konvive ho rai hothotu ba jogu Olímpiku ho dimensaun mundiál”, dehan Abrão Saldanha.

Nune'e Atleta, Imelda Felicita hatete, durante iha faze preparasaun hasoru difikuldade barak maibé iha nafatin espiritu hodi kompete iha jogu Olímpiku.

“Tuir kondisaun ne'ebé iha ami prepara tuir kondisaun Timor nian ne'ebé iha mós difikuldade barak mak ami infrenta, maibé nafatin ami espiritu boot prepara di'ak liután atu partisipa iha jogu Olímpiku”, afirma Imelda.

Atleta sira ne'ebé sei ba kompete iha jogu olimpiku ho modalidade rua hanesan atletizmu ne'ebé reprezenta husi Felisberto de Deus ne'ebé halai 1.500 metru, iha modalidade natasaun reprezenta husi atleta Imelda Felicita  no Atleta José Joao da Silva.

Jogus Olímpku ne'e sei durante semana rua nia laran, ho orsamentu ne’ebé apoiu ba atividade hamutuk rihun US$40. (*)