“Embaixadór ohin (08/07) mai atu hasoru malu ho ha'u. Ha'u kontente tebetebes tanba ami bele ko’alia ba malu, nia husu oituan kona-ba ha'u-nia servisu iha área asuntu parlamentár no komunikasaun sosial e ha'u esplika ba nia saida mak ha'u halo iha Parlamentu no saida mak halo iha Komunikasaun Sosiál”, informa Ministru Francisco iha Gabinete MAPKomS, Palásiu Governu, kinta (08/07).

Iha sorumutu ne'e embaixadór EUA mós informa ba MAPKomS, governu Amérika prontu atu ajuda Timor-Leste iha área saida de'it inklui área Komukasaun Sosiál.

“Nia (Embaixador) ba ona hasoru Prezidente RTTL.ep no nia informa mai ha'u, no ha'u mós dehan ba nia kontinuasaun sei la'o, karik ba futuru iha tan buat ruma ne'ebé mak ami presiza halo kooperasaun ho EUA ami sei organiza e sei hato'o pedidu ne'e ba EUA”, hatete nia.

Iha fatin hanesan Embaixadór EUA, Charles Kevin Blackstone hatete, iha ekontru ho MAPKomS hakarak atu hatene servisu ne'ebé Ministru halo iha Parlamentu liliu iha área Komunikasaun sosiál

“Sim ha'u hasoru ministru, atu komprende di'ak sira-nia servisu no nia (Ministru) esplika mai ha'u-nia servisu iha Parlamentu reprezenta governu nomós hanesan Ministru ezerenti ba lei kona-ba imi (mídia), nomós ami halo diskusaun kona-ba supervizaun ne'ebé Ministru halo ba mídia RTTL.ep no ajénsia Tatoli”, afirma embaixadór EUA.

Maibé kona-ba governu nia apoiu ba mídia RRTTL.ep no Ajénsia TATOLI, sira la interven iha konteudu ne'ebé mak mídia rua nia iha, maibé governu fornese de’it apoiu ne'ebé presiza ba mídia rua ne'e. (*)