“Sé mak simu vasinasaun kompleta no mai ka liuhusi país sira ne’ebé identifika ona variante Delta SARS-CoV-2, tenke kumpre kuarentena loron lima. Sé mak la simu vasinasaun kompleta kontinua kumpre kuarentena loron 14”, informa Ministru Prezidénsia Konsellu Ministrus, Fidelis Leite Magalhães, iha Palásiu Governu, kinta (01/07).
Tanba kompara ho medida sira ezekusaun anteriór deklarasaun estadu emerjénsia, halo ona alterasaun sira hodi redús risku importasaun husi variante Delta SARS-CoV-2 iha Timor-Leste.
“Governu determina ona katak ema hothotu ne’ebé hakarak tama iha Timor-Leste tenke aprezenta komprovativu husi rezultadu negativu husi teste detesaun SARS-CoV-2 ka COVID-19, ho antiguidade la liu loron 5”, afirma nia.
Hafoin halo análize ba aprezentasaun kona-ba pontu situasaun epidemiolójika país nian, husi koordenadór sira husi Sala Situasaun Sentru Integradu Jestaun Krize (SIJK), Konsellu Ministrus aprova ona projetu Dekretu Governu nian kona-ba medida sira ezekusaun Deklarasaun Estadu Emerjénsia, ne’ebé efetua husi Dekretu Prezidente Repúblika n. 39/2021, loron 30 fulan-juñu hodi hatán ba pandemia COVID-19.
“Estadu emerjénsia, ne’ebé renova daudaun ne’e, abranje ba territóriu nasionál tomak no vigora husi tuku 00:00 loron 2 fulan-jullu tinan 2021 to’o tuku 23:59 loron 31 fulan-jullu tinan 2021”, dehan Fidelis. (*)