Assinatura husi nota intendimentu ne'e, foka ba asuntu kooperasaun bilateral nomós halo reabilitasaun Aeroportu Baukau nian no apoiu poténsial ba setór aviasaun sivil iha TL.

“Ho memorandu rua ne’e, Timor-Leste ho Estadu Unidus Amérika sei foti medida atubele hahú projetu reabilitasaun konjunta ba Aeroportu Baukau, nomós atu hahú diskusaun entre parte rua kona-ba apoiu poténsial ba setor aviasaun sivíl Timor-Leste nian, ne'ebé sei bele ajuda dezenvolve programa atu promove dezenvolvimentu ekonómiku no diversifikadu ba área aviasaun sivíl”, dehan Jose Reis iha Fatuhada, segunda (28/06).

Projetu reabilitasaun konjunga ba Aeroportu iha Baukau, nu’udar atu hala’o edifikasaun ba kapasidade sira iha diversifikasaun ekonómia dadaun sai frazíl liu tanba pandemia Covid-19, no sai mós pilár importante no fundamentál ida tan ekonómia nasionál, hanesan defeza ho seguransa ba rekursu ekonómiku.

“Nune'e, projetu ida ne'e sei iha dezenvolvimentu ekonómiku nu'udár foku prinsipál no Aeroportu Baukau sei sai ho natureza aviasaun ho diresaun ba atividade komersiál sira, no projetu ida ne'e sei sai mós nu'udár reforsu ba kapasitasaun F-FDTL nian”, hatete nia.

Tanba pasu husi akordu ida ne’e sei kontribui ba progresu planu ne’ebé iha ona ba dezenvolvimentu rejiaun Leste, espesfikamente ba nasaun tomak.

Entretantu Embaixadór Estadus Unidus Amérika (EUA) iha TL, Kevin Blackstone hatete, husi negosiasaun ne'ebé naruk, maibé Estadus Unidus Amérika, responde ona pedidu husi governu Timor-Leste hodi selebra akordu intendimentu ida ne'e, atubele avansa ona hodi reabilitasaun Aeroportu Baukau.

“Ha'u hakarak atu reforsa tan, saida nak ohin Vise Primeiru Ministru hatete, projetu ida ne'e, maske finansia bazeia ba akordu bilateral iha área militár seguransa ne'ebé Estadus Unidus ho Timor-Leste iha, maibé bainhira hala'o, sei fó mós benefísiu ekonómiku ba Timor-Leste”, dehan Kevin Blackstone.

Tanba ne’e, EUA mós sei fornese mós aviaun ida kompletu ho nia dispozitivu vizilánsia nian atubele utiliza ba halo patrullamentu Aéreo ba domíniu marítima Timor-Leste nian hodi identifika peska ilegál iha tasi.

Prosesu konstrusaun ba obra sei hala'o iha fulan-Outubru mai,  tuir faze, maibé sei hahú ho survei iha fulan jullu, molok hahú konstrusaun.

Apoiu ida ne’e inklui dezenvolvimentu komponente Aéreo F-FDTL nian no konstrusaun eskala ki’ik hodi hadi'a seguransa no kapasidade armazenamentu Aeroporto Baukau.

Projetu ida ne’e inklui doasaun aviaun Cessna 206 ida fábrika iha Estadus Unidus, instalasaun ba bareira (lutu) seguransa, konstrusaun armazen ba ekipamentu no ekipamentu Amérika nian ho kualidade a’as hanesan karreta tula kombustivel, karreta bombeiru, forklift, kamioneta rua Ford F-350, karreta hamos pista no veíkulu apoiu seluk ba seguransa ekipamentu aeroportu nian.

Maibé Aviaun ne’e sei inklui ho kámera ho teknolojia avansadu atu F-FDTL utiliza ba observa Timor-Leste nia área marítima inklui hodi responde ba dezastre natural.

Projetu ne’e, finansia husi Ministériu Defeza Estadus Unidus ho alokasaun orsamentu millaun US$10,6 hodi hadi'ak kapasidade Timor-Leste nian iha área seguransa, asisténsia umanitária no operasaun sira ba dezastre naturál hodi kontribui ba dezenvolvimentu ekonómia ida ne’ebé reziliente no diversifikada. (*)