Xefe Casa Sivíl Prezidente Repúblika, Francisco Maria Vasconselo hatete, reuniaun KSDS ho KE hotu ona, tanba pedidu governu nian mai Prezidente Republika, atu husu ba Parlamentu Nasionál hodi renova estadu emerjénsia.
“Informasaun ne'ebé mak ita simu katak, vírus delta mós hahú tama iha Indonézia, tanba ne'e mak ohin governu halo pedidu mai, konsellu rua ne'e reuni ona no rekomenda ba Prezidente Repúblika atu hato'o ba Parlamentu Nasionál atu bele diskute aprova ka la aprova, se aprova, Prezidente Repúblika sei públika iha jornal da repúblika”, dehan nia hafoin reuniaun iha palásiu prezidensiál Bairopite, segunda (28/06).
Maske medida nafatin hanesan uluk, maibé konsiderasaun boot liu mak, vírus Delta ho Alfa ne'ebé mak komesa espalla iha nasaun barak.
“Medida sira haruka ba Parlamentu Nasionál aprova, Prezidenste Repúblika dekreta, maibé medida sira ne'e governu mak tenke responsabilidade atu halo dekretu ida kona-ba oinsá implementa estadu emerjénsia iha teritóriu tomak, liliu iha fronteira terestre, tasi no mós aviaun”, esplika nia.
Iha fatin hanesan Diretór Forun Organizasaun Naun Governamental Timor-Leste (FONGTIL), Daniel Dos Santos Carmo hatete, oportunidade ne’ebé fó ligadu ho pedidu governu nian extensaun estadu emerjénsia ba dala-15.
“Agora buat ruma ne'ebé ami kestiona mak, ita iha estadu emerjénsia depois ita foin dada de'it konfinamentu obrigaróriu ita-nia Polísia Nasional Timor-Leste (PNTL) sira la kontrola máximu tiha ona no fin de semana ema halo ona festa englomerasaun”, dehan nia.
Tanba variante foun vírus delta iha Indonézia ne'e perigu, dadaun ne’e halo hela esforsu, atu vasina, foin aselera oituan variante foun mosu, maibé oinsá mak PNTL sira bele halo kontrola didi’ak ba atividade englomerasaun.
“Ha'u haree ema barak mak iha osan, sira iha osan nusa la apoiu ema sira agora araska los ne'e, entaun ita husu ba PNTL haree ba ida ne'e, konfinamentu obrigatóriu mak laiha, maibé serka sanitária sei la'o hela, ita haree membru PNTL sira, ha'u lahatene sira-nia kna’ar di'ak oinsá, atu asegura englomerasaun no atividade sira halibur ema barak”, afirma nia. Diretor FONGTIL. (*)