Deputada Fretilin, Maria Angelica Rangel hatete, bazeia ba konstituisaun artigu 145 iha alinea 3 katak, Parlamentu Nasionál bele ejize membru governu sira hodi buka hatene oinsá ho sira-nia ezekusaun.

“Eh orsamentu ba covid nian, ezekusaun foin mak 34.9%, ami ko’alia ida ne'e tanba ejizénsia mai husi osan ne'ebé mak ita tau tiha ona, aprova tiha ona iha ratifikativu, ejizénsia mai husi ita-nia komunidade”, deklara nia iha plenária Parlamentu Nasionál, segunda (28/06).

Bankada Fretilin haree katak, ezekusaun pursentu ne'e foin atinje 34.9% tanba kompaña sira ne'ebé oferese hahán ba ema sira iha kuarantena mós to'o agora balun la selu, nomós ema nia frontline barak mak la selu.

"Oinsá, se Ita la selu ema nia diretu sira ne'e, e atu hetan mós ezekusaun ba orsamentu anual ne'ebé mak parlamentu nasionál aprova iha ratifikativu ida ne'e,"hatete nia.

Nune'e, Deputada Elena Martins hatete, kona-ba pagamentu subsídiu ba lina frente balun, la'ós hothotu, oinsá atu aselera ba sira-nia subsidiu liliu pesoál limpeza sira.

“Sira mós husu dehan ami pesoál limpeza ne'e, balun fulan 9 ona, balun fulan 11 ona, agora ami sura hela ami osan mais, seidauk tama, ne'e sira-nia preokupasaun ne'ebe sira hato'o mai ami”, informa nia. (*)