Tanba iha regra obrigatóriu hodi aplika ba funsionáriu inklui deputadu sira atu simu vasina wainhira hala'o servisu ka fiskalizasaun.
"Ba funsiónariu sira ha'u deside ne'e obrigatóriu, kuandu la vasina, sira labele tama iha Parlamentu. Ha’u fó tiha ona kritériu atu hetan autorizasaun ba vizita fiskalizasaun, kuandu nia (deputadu) la vasina nia la tuir”, deklara Aniceto Guteres hafoin remata vasina ba doze daruak iha resintu Parlamentu PN, sesta (18/6).
Tanba, atu normaliza vida povu no estadu iha nasaun ida ne'e, sidadaun hotu tenke tuir vasina, atu-nune'e aumenta sira-nia imunidade hodi kontra moras covid-19.
Aliende ne’e, atu normaliza PN nia servisu, dalan mak hothotu tenke simu vasina.
Tanba ne'e, deputadu ne’ebé la vasina, nia sei la tuir fiskalizasaun tanba nia lori vírus hasoru populasaun iha Munisípiu.
Husi vasina ne'e kuandu simu kompletu ba dala-rua, siknifika sira sei la'o livre, maibé nafatin tuir protukolu covid-19 nian, taka máskara, halo distansiamentu inklui mós fase lima bebeik.
"Agora se nia hanesan ninia partidu ne'e urusan ninian, ba hanesan deputadu, tenke kumpre rekezitu, vasina tiha mak bele hetan autorizasaun atu ba hala'o fiskalizasaun”, afirma nia.
Ba deputadu no funsionáriu balun iha Parlamentu Nasional (PN) loron sesta (18/06) komesa simu ona vasina prevensaun covid-19 ba segundu doze, maske balun seidauk simu doze dahuluk. (*)