“Ha'u hakarak afirma dala ida tan, ne'e desizaun governu nian, hanesan soberanu, ita iha desizaun governu, ita-nia xefe governu fó sai ona katak ida ne'e la kansela ita tenke lori tanba ita-nia preparativu sira la'o atu besik to'o finál ona”, dehan Mnistru José hafoin sorumutuk Ministra Negósiu Estranjeiru no Kooperasaun (MNEK), Adaljiza Magno iha Pantai Kelapa, tersa (15/06).

Maske hetan kritika maka’as husi sosiedade sivíl ho sidadaun balun maibé opiniaun ne’ebé fó sai konsidera normal, tamba iha nasaun ida tenke iha kritika, maibé desizaun iha Konsellu Ministru hasai, hanesan nasaun soberanu sempre la'o ho desizaun governu nian.

“Timor-Leste nia prezensa iha Expo Dubai importante tebes, maske iha kondisaun no situasaun difísil tanba hanesan governu sempre fó mensajen pozitivu esperansa ba konvite ne'ebé ita simu ona”, afirma nia.

Prezensa Timor-Leste iha Expo ne’e hanesan lori imajen nasaun nian ba liur, maske nasaun ki’ik maibé prontu atu projeta nasaun husi imajen iha nível rejionál nomós iha internasionál.

“Ita uza ida ne'e hanesan promosaun ba ita-nia poténsia rekursu sira ne'ebé iha, hodi halo promosaun tamba ida ne'e eventu ida ne’ebé kadavez tinan 5 dala ida, nune'e hanesan governu ita presiza foti oportunidade ida ne'e ba partisipa”, esplika nia.

Aleinde ne'e sosiedade mós prefere ba governu oinsá atu halo rekuperasaun ekonomika hodi hatan ba proplema sosiál no ekonómia ne'ebé povu hosoru hela, maibé sosiedade nia pontu de vista válidu tebes, governu konsidera maibé ministériu ida-idak iha ninia papel no lei orgánika ne'ebé MTKI iha atu halo promosaun nasaun ba liur.

“Prosesu ne'e tomak, la'os ministériu ne'e mak atu ba halo ida ne'e la’e, ministériu fasilita prosesu tomak, la'ós turizmu de'it, ministériu fasilita liña ministerial ne'ebé iha poténsia rekursu iha ita-nia rain”, hatete Ministru. (*)