“Kampaña ne'e ho atu partilla informasaun kona-ba importánsia husi vasinasaun COVID-19 hodi enkoraja no konsensializa komunidade atu tuir vasinasaun nune'e bele prevene propagasaun vírus mortál ne'e”, dehan Ministru Francisco Martins iha sala administrasaun Munisípiu Manatutu, sesta (11/06).
Vasinasaun COVID-19 ne'e importante tanba bele hasa'e imunidade komunidade nian, hodi prevene infesaun moras kontajioza ne'e.
"Komúnidade sira presiza simu vasinasaun ne'e, tanba vasinasaun ne'e bele hasa'e imunidade komunidade nian, hodi prevene infesaun moras kontajioza”, afirma Ministru.
Iha fatin hanesan, Administradór Munisípiu Manatutu, Fernando Domingos de Almeida Sousa Junior, hamutuk ho autoridade lokál hato'o apresiasaun no agradesimentu ba MAPKOMS tanba bele to'o iha sira nia fatin hodi fahe informasaun kona-ba prevensaun COVID-19 liuhosi vasinasaun.
"Agradese no orgullu tebes tanba bele marka ona prezensa iha ami-nia fatin hodi espalla ona informasaun balun kona-ba vasinasaun Covid-19 ba komunidade sira iha Munisípiu Manatuto”, haktenik nia.
Entretantu iha kampaña vasinasaun ida ne'e mós marka prezensa husi komandante polísia munisípiu Manatutu ho ninia estrutura no dirijente instituisaun no entidade relevante sira. (*)
