Diretór Ezekutivu FONGTIL, Daniel do Santos hatete, iha tinan 2020 to'o agora, membru PNTL sira servisu iha liña frente, hetan subsídiu, maibé mosu lamenta nafatin durante ne’e.

“Ami-nian haree mak ne'e sira (PNTL) laiha esperitu atu dedikadu servisu ba ita-nian rai, sira dehan sira toba iha lona okos tinan tomak, sira halo tornu, (fahe grupu), maibe sira simu osan ba hán nia loroloron, sira simu subsídiu husi governu, dehan sira iha liña frente hotu”, dehan Daniel iha nia kna’ar fatin Kaikoli, sesta (28/05).

Tanba ne'e, parte FONGTIL husu ba membru PNTL sira, atu lalika fó rajaun dehan toba iha lona okos tinan tomak.

Mesmu nune'e, FONGTIL mós aseita Primeiru Ministru, Taur Matan Ruak nia lamentasaun ba populasaun ne’ebé kontra instituisaun PNTL.

Tanba PNTL ne'e instituisaun ida, ema ne’ebé hala'o servisu, dala ruma balun hatudu brutalizmu, maibé la siknifika instituisaun PNTL tomak.

Nune’e mós, Vise Diretór Yayasan Hak, Filomena Barros dos Reis, husu ba governu atu tau atensaun ba instituisaun PNTL wainhira halo atuasaun labele iha agresaun fíziku tanba povu vítima bebeik ona.

"Governu tenke tau atensaun ba polísia ne’ebé hola parte seguransa labele halo agresaun fizika ba populasaun, tanba povu ne'e vítima bebeik ona”, dehan nia. (*)