"Ita-nia hanoin mak tuir loloos, iha situasaun ida agora, prioridade liu mak produsaun no hasa'e produtividade oinsá atu atrai ema filafali ba halo natar, halo toos, karik ita bele fó subsidiu balu para sira bele uza subsídiu ne'e no bele halo toos ho natar atubele produz”, dehan Peskizadór Lao' Hamutuk iha Asuntu Agrikultura no Rai, Mariano Ferreira iha nia kna'ar fatin Bekora, kuarta (19/05).

Ho produsaun ne'ebé agrikultór sira produz, bele uza ba konsumu, produtu balu bele fa'an ba merkadu, no governu mós bele sosa hodi bele distribui fali ba programa sira hanesan sesta bázika ho seluk tan.

"Apoiu mós toos na'in sira, hanesan apoiu subsídiu mais, apoiu iha tempu balu para sira bele auguenta hodi bele halo produsaun, e mós apoiu mákina hodi oinsá sira bele hadi'ak sira-nia toos no natar”, afirma nia.

Ba ida ne’e, Ministru Agrikultura no Peska (MAP), Marcos dos Reis dehan, sira iha subsídiu ne'ebé foka liu ba inundasaun iha loron 04 to'o 05 fulan-abril tinan 2021, ne'ebé fó apoiu direta ba komunidade agrikultór sira, maibé ho Loza Agrikultór, sira fó liuhosi Sekretária Estadu Protesaun Sivíl (SEPS).

Tanbe ne'e, MAP laiha orsamentu ketak atu aloka subsídiu ba agrikultór sira hodi hasa'e produsaun nomós atu diversifika ekonómia iha rai laran.

Ministériu laiha orsamemtu ida ne'ebé mak atu trata assuntu sira ne'e, maibé propoin orsamentu ba atividade hothotu, tanba esforsu ministériu nian la’o mak atividade sira la’o nafatin.

“Esforsu ami-nian mak ne'e, ami-nia atividade ministériu nian la'o nafatin, sei halo aproximasaun ho agrikultór sira para kuda nafatin, mezmu ita iha situasaun ida serka ou pandémia", hatete nia ba www.tempotimor.com iha, Ai-tarak Laran, kuarta (19/05). (*)