Ministru Francisco Martins Jerónimo hatete, servisu planeamentu iha liña ministérial hotu, hahú prepara hela planu elaborasaun orsamentu ba tinan 2022.
"Agora servisu kona-bá planeamentu ho orsamentu sira ne'e, agora ekipa sira kada ministériu, ami-nia ministériu prepara ona kondisaun haree filafali, sá planu no orsamentu ba 2022 nian, hodi nune'e tau iha ne'e para aprezenta ba iha CROP”, dehan nia ba www.tempotimor.com iha PN, tersa (27/04).
MAPKOMS deside hahú prosesu elaborasaun orsamentu tanba iha fulan-jullu ne'e, elaborasaun planu hotu tenke tama ona ba jornál orsamentál nian, hafoin aprezenta ba Komisaun ba Revizaun Orsamentu Polítiku (CROP).
Enkuantu, Inspetór Gabinete inspesaun, Xefe Gabinete SEKOMS, Diretór Nasionál sira, Coordenadór Unidade sira, xefe Departamentu inklui Asesór husi Gabinete MAPKOMS no SEKOMS nian iha loron 26 fulan-abril, konsege realiza ona reuniaun ne'ebé hala'o iha auditóriu Prezidénsia Konsellu Ministru, Palásiu Governu.
Koordenadór Unidade Planeamentu, Janio Aldroaldo hatete, dadaun hala'o sorumutk hodi kordena ho organizmu hothotu iha ambitu MAPKOMS nian, hodi armoniza hanoin iha elaborasaun programa no planu ba tinan 2022 nian.
“Iha formatu ka template ida ne'ebé disponibiliza husi ministériu finansa no Unidade Planeamentu Monitorizasaun no Avaliasaun (UPMA), husu atu ministériu idaidak tenke prienxe hodi define ninia programa tempu naruk nian, médiu no tempu badak ninian”, dehan nia.
Atu nune'e, prienxe tiha formatu ne'e, nu’udar esbosu ida ba programa no atividade MAPKOMS nian ba tinan 2022, hodi aprezenta ba aprovasaun MAPKOMS, antes submete ba ministériu Finansa no UPMA iha 27 fulan-abril. (*)