Tanba udan boot ne’ebé akontese iha semana rua konsege hakotu estrada liga ba Remixio ne'ebé fó impaktu ba populasaun sira-nia movimentu.
Deputadu Domingos Carvalho informa, estrada ne’ebé kotu, mak MOP atu buka alternativa oinsá bele solusiona estrada refere.
"Dalan aileu-remixio ninian ne’ebé kotu, hamutuk neen kedas. Komunidade sira lorloron mai hasa'e au, tenta tula netik iha lete para iha netik dalan sira atu ultrapasa husi sorin ba sorin maibé labele nafatin, tanba ne'e ha’u husu ba MOP presiza buka solusaun hodi rezolve”, hatete nia iha plenária PN tersa (27/04).
Estrada diresaun ba Remexio ema barak mak liu (Ba-Mai), hanesan deputadu sira hotu hatene katak, dalan ne'e fasilita ema barak, maibé dala barak ema ko’alia maibé alternativa atu loke fali dalan foun laiha ona.
"Tenke ba filafali loke fali husi parte Beluru ninian, foin bele tau tun husi foho Qero ninian mai igreja e depois foin bele tama Remexio”, dehan nia.
Fatin hanesan Deputadu Bankada FRETILIN, Jose Paiceco husu ba governu atu rezolve mós estrada diresaun Laulara ho Likidoe, ne’ebé liga mai Lahane.
"Ida seluk mak estrada iha Maleu ninian, ita haree inundasaun ne'e fulan ida ona, maibé dalan sira kotu ne'e kotu nafatin hela, liuliu dalan Maleu ba Sarlala ne'e”, hatete nia.
Hatan ba kestaun ne'e, Ministru Asuntu Parlamentár no Komunikasaun Sosial (MAPMOMS), Francisco Martins Jerónimo dehan, kestaun estrada ne’ebé levanta husi deputadu Domingo Carvalho, no Jose Paiceco nian, kona-ba estrada Remexio, Sarlala, no Lahane, governu rejista, no sei submete ba MOP.(*)