Deputadu ne'e simu informasaun balun husi autoridade sira iha Suai katak, guarda prizaun Suai servisu durante ne'e sempre halo deskriminasaun maka’as inklui baku dadur sira la tuir regra no lei ne'ebe vigor.

“Sira (guarda) dezenkuantu halo deskriminasaun ba ita-nia prizionéiru sira, hanesan ita-nia maluk sira husi same ba tama kadeia iha Suai, ita-nia guarda prizaun sira kalan mak foin bolu sai sira ba iha Fatin Kotuk (Ruan Belakan) depois sira baku, no tuku tebe to'o aleza”, deklara nia iha plenária PN, tersa (27/04).

Bankada KHUNTO mós haruka ona karta ba Providóriu Diretu Umanu no Justisa (PDHJ sigla portugues), ho asosiasaun Yayasan HAK, atubele halo advokásua no kontrola ida ne'e nune'e hato'o ba Ministériu Públiku.

"Ami mós halo tiha karta ida ba, sira, hodi hare ba atetude husi ita-nia maluk funsionáriu prizaun iha Suai, hodi halo deskriminasaun ba ita-nia maluk prizoneiru sira, liuliu iha prizaun Suai”, dehan nia.

Lamenta mós ba atetude funsionáriu guarda prizaun sira iha Suai fahe ai-han ba prizoneiru sira balun oituan no balun barak.

"Fó aihan ne'ebé mak di’ak, e balun sira fó aihan oituan, ida ne'e ita konsidera ne'e deskriminasaun boot ida”, afirma nia.

Kada tinan Parlamentu Nasional aprova orsamentu hamutuk rihun US$ 41 aloka ba atu atende prizoneiru sira, tanba konsidera dadur sira nu’udar ema no la'os animal.

"Orsamentu ne'ebe mak aloka ba kuaze ita-nia prizaun iha Timor laran tomak, tuir hau nia hatene kada fulan US$41 mil, ida ne'e atu responde ba iha ema sira ne'ebe dadur, la siginifika sira kriminozu be ita konsidera sira hanesan animál”, dehan nia.

Hatan ba kestaun ne'e, Ministru Asuntu Parlamentár no Komunikasaun Sosial (MAPMOMS), Francisco Martins Jerónimo hatete, kazu kona-ba funsionáriu Guarda Suai no Same, Polísia PNSIK sei investiga hela, tanba ne'e termina ona prosesu investugasaun.

"Kazu ida ne'e sei tama hela iha investigasaun, Polísia foti ona dadus hotu, e sei prosesa tuir dalan legál”, dehan nia. (*)