Pasajeiru hirak ne'e, viajen husi Dili, iha loron domingu (18/04), maibé to'o iha Malázia na’in-35 pasaporte Timor-Leste no na'in-18 ho pasaporte Portugál kontinua viajen ba Inglaterra, maibé iha fali teste SWAB husi 18 ne'e ida pozitivu Covid-19, entaun 17 mak kontinua viajen.
Nune'e, iha loron sábadu (24/04), Aviaun Malindo tula hikas Timoroan na'in-35 mai Timor-Leste to'o iha Aeroporto Internasionál Prezidente Nikolao Lobato Komoro, maizoumenus tuku 12:30 otl.
Responsavel ekipa Fly Timor, Pedro Carascalão afirma, iha loron domingu pasajeiru na'in-35 ne'e liuhusi ajensia Narpov, maibé to'o iha Malázia, mosu problema.
"Sim, sé Aviaun entre Dili kuala-lumpur ne'e ha'u-nia problema tomak, 100 pursentu ha'u-nia responsablidade, Aviaun tarde ou oinsá ne'e ha'u-nia problema tomak, maibé problema ida ne'e akontese depois de ha'u-nia servísu remata”, dehan nia iha Aeroporto Internasionál Prezidente Nicolau Lobato, sábadu (24/04).
Bainhira pasajeiru sira sai ona husi aviaun hodi hein fali seluk mak hetan problema, parte ajensia tenke responsabiliza.
Problema ne'e, hafoin investigasaun ba pasajeiru sira, mosu identifikasaun katak, tiket PP mak laiha, teste SWAB Timor-Leste mak laiha kualidade, no uza pasaporte Timor-Leste nian.
“Ha’u haree, sira momentu to'o iha Kuala lumpur, border kontrol la simu ema 53, pasaporte Portugál no mós pasaporte Timor-Leste, sira la fó, tanba primeiru sira deskonfia, ikus fali mai dehan tiket PP laiha, ko'alia ba mai, pasajeiru hein hela, la konsege ba to'o aviaun ne'ebé sira atu uza ba tiha ona, entaun sira ba fali Otel”, dehan nia.
Pedro esplika nia parte responsabiliza oinsá Aviaun bele mai hodi tula pasajeiru sira husi Díli ba Kuala Lumpur, maibé kona-ba Billete responsabilidade ajensia nian, tanba ajensia mak simu osan husi pasajeiru sira.
"Solusaun rua de'it, ida fó fila ema (pasajeiru) nia osan, segundu ajensia bele ko'alia ho pasajeiru, hein fali aviaun bainhira iha fulan-maiu mai, pasajeiru la presiza hasai osan, ajensia tenta buka dalan para sira bele kontinua fali viajen, agora depende ba pasajeiru , tanba sira iha direitu, ita labele obriga", sujere nia.
Kona-ba problema ne'e, www.tempotimor.com hakat to'o edifísiu Agensia Narpov iha Fatuhada maizoumenus tuku 13:20 atu halo komfirmasaun, maibé laiha fatin. (*)