Prezidente Autoridade Nasionál Aviasaun Timor-Leste (ANATL), José Trindade da Cruz Pinto hatete, ANATL iha funsionáriu hamutuk 167 mak simu vasina.
"Funsionáriu sira servisu .... iha Aeroportu, ne'e konsideradu hanesan front line. Katak ema sira ne'e mak iha liña frente para halo atendimentu ba movimentu ema tama sai nian”, dehan nia.
Tanba ne'e, Ministériu Saúde (MS) ho Organizasaun Mundial Saúde (OMS) konsidera katak ema sira servisu iha Aeroporu ne'e risku aas ba virus covid-19.
Tanba ne’e, Médiku husi Ministériu Saúde (MS), Doutora Veronica Belo esplika, vasina ne'e fó prioridade ba ema hotu.
"Agora dadauk ne'e fó liu atensaun ba ema moras, tensaun, ran midár, ema sira ne'e, ho ita primeiru liña tanba ita loroloron hamutuk ho ema, ne'ebé fó uluk mai ita”, hatete médiku ne'e, molok halo vasina ba funsionáriu ANATL sira iha Aeroportu, sesta (16/04).
Maibé, ema ne’ebé moras gráve la simu vasina. Tanba vasina iha dahuluk ne’e ho volume 0,5pp, no semana 8 to'o 12, hafoin ba daruak ninian.
Vasina ne'e tenke simu dala-rua, mak iha primeiru dosis foin hetan pursentu 74 (74%) no segundu dosis ninian bele kumpri to'o 84 pursentu, tanba vasina hothotu la to’o 100%.
Tuir observasaun www.tempotimor.com iha terrenu nota, pessoal liña frente sira ne'ebé simu uluk ona vasina, kompostu husi membru sira husi Unidade Polísia Fronteira (UPF), funsionáriu sira Autoridade Nasional Aviasaun Timor-Leste (ANATL), inklui Stakeholder sira hotu ne'ebé servisu iha Aeroportu Komoro, sei simu hotu vasina AstraZeneca.(*)
