Deputadu ne'e lamenta ho redasaun RTTL ne’ebé ladun verifika publikasaun notísia iha loron 14 fulan-abríl ho títulu "Somotxo husu Polisia Asegura Xanana no Tiru Manifestante”.
"Primeiru ha’u husu ba SEKOMS (MAPKOMS), buat ruma iha TVTL (RTTL), presiza halo avalizasaun ba redasaun”, deklara nia iha parlamentu Nasional (PN), kinta (15/04).
Nia konsidera iha publikasaun notísia ne'e, redasaun koa liafuan balun, tanba notísia ladun hanesan ho nia deklarasaun rasik.
"Ha’u husu TVTL para responsabiliza ba nia aktu”, afirma Somotxo.
Tanba ne’e, sei haruka karta ba SEKOMS atubele haree no identifika, títulu notísia inklui deklarasaun Somotxo nian tanba konsidera redasaun tesi sai deklarasaun balun hodi fó impaktu notísia labele balansu.
Husu mós Konsellu Impresa (KI) atu tetu komportamentu jornslista no redasaun, nune'e sira bele muda hahalok balun.
Haree ba komunikasaun sosial jurnalizmu nian iha mundu tomak, iha buat rua de'it, " imi mak lori pas no imi mak lori funu mai. Tanba mídia la hatene interpreta ema nia liafuan, ne'e fasil atu funu mosu."
Ho ida ne’e, ejize atu Radiu Televizaun Timor-leste, empreza públiku, labele iha ema mafiuzu atu soran líder sira.
“Ha’u alerta de'it ha’u lakoi ema mafiozu sira, iha ita-nia komunikasaun sosial, Republika Demokrátika Timor-Leste ninia televizaun”, afirma nia.
Hafoin publikasaun husi RTTL,ep, ema barak kondena eis Sekretáriu Rejiaun gerilia IV iha mídia sosial no mídia konvensional hanesan vetaranu balun hamutuk ho eis porta voz petisionáriu 2006, Gastao Salsinha ne’ebé halibur-an iha movimentu Solidariedade Rejistensia Munisípiu Ermera ba Apoiu Maun Boot Kay Rala Xanana Gusmão iha sira nia deklarasaun iha Ermera, kuarta (14/04).(*)