Matebian refere dadaun sei iha izolamentu Sentru Vera Cruz, sidauk hala'o prosesu funebre, tanba mosu dezentendimentu entre família ho Sentru Integradu Jestaun Krizi (SIJK).
Maibé, ho situasaun ne'e, Primeiru Ministru, Taur Matan Ruak, hatete, Sentru Integradu Jestaun Krizi (SIJK) mak bele halo negósia ho família matebian para bele hetan solusaun.
"Problema Vera Cruz nian, ha'u informa bá sua exelensia Prezidente Repúblika katak, ohin ha'u fó instrusaun ba sala situasaun para komesa negósia ko'alia ho família sira para bele hakoi seiñor ne'ebé mate" Dehan PM Taur hafoin sorumutu ho Prezidente Repúblika Francisco Guterres Lu-olo iha Palásiu Prezidensiá Bairo-pite, kinta (15/04).
Ho kestaun hakoi matebian refere, Parte PM laiha komúnikasaun ho líder Karizmatiku, Kay Rala Xanana Gusmão.
"Ha'u laiha komúnikasaun ho Maun Xanana, maibé ha'u fiar katak, sira ne'ebé iha sala situasaun, reprezenta ha'u hodi ko'alia ho família sira, ho Maun Xanana rasik para hetan solusaun ba ida ne'e", PM afirma
Nune'e, dalan ikus liu ba atu hakoi matebian ne'e, só vale maka buat ne'ebé médiku sira desidi.
Naturálmente, problema ida ne'ebé tenki tau atensaun maka, protokolu saúde nian.
"Iha esplikasaun barak katak, regras sira ne'ebé impoin, protokolu ne'ebé fó ne'e desizaun governu nian, lae, ne'e la'ós desizaun governu nian, protokolu ida ké médiku sira mak establese, saúde mak tenke establese, no ne'e la'ós desizaun governu nian", PM akresenta
Hanesan xefe ba sala situasaun, rona buat ne'ebé médiku sira ko'alia, dezde primeiru internu ida ne'ebé mate uluk, no ida agora ne'e.
"Purtantu hetan solusaun ida fali iha saúde, só ké ha'u nia pedidu ida ba ita nia doutór sira, ha'u bolu Doutór Rui, Doutór Sergio, Doutór Nelson servisu iha ne'eba, tanba sala situasaun ne'e lidera husi militár rua ho tan ha'u esi-militar ida, entaun saúde ami la intende, entaun ami husu sira para fó konsellu",Dehan PM
PM Taur husu ba Doutór sira ne'ebé hala'o servisu iha SIJK hotu-hotu tenki ko'alia liafuan ida, labele ida-idak ko'alia ninian.
"Ha'u mós ohin husu para sira ko'alia lia fuan ida de'it, labele Doutór Sergio hatete ba Maun Xanana ida, ida ne'eba hatete, ida seluk, ha'u hakarak hatete, A ne'e A, B ne'e B, para ita hotu tuir ida ne'e, labele atira kulpa, tanba governu ne'ebé ha'u lidera ninia preokupasaun ida de'it, sé Ita bele halo buat hotu para ita nia ema labele mate, ita tenki halo, tanba Covid ne'e problema global", Taur Husu
Nia espera, problema ne'e sei iha solusaun.
"Ha'u espera katak, problema ida ne'e ita bele ultrapasa, ha'u mós aproveita hanesan Primeiru Ministru, no mós Xefe ba sala situasaun lidera ida ne'e, husu deskulpa ba família sira, liu-liu ida ne'ebé hakoi uluk ké balun dehan, hakoi la dun di'ak laiha dignidade ha'u husu deskulpa ba sira, maibé ha'u mós husu komprensaun sira nian para ké tau ema barak ninia saúde ne'e emprimeiru lugar", Tau husu
Matebian Armindo Borges hakotu iis iha loron domingu 11 fulan Abríl tinan 2021. (*)
