Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo hatete, membru família na’in-tolu husi matebian rejultadu hatudu iha na’in-rua pozitivu.
“Hafoin deteta pozitivu SARS-CoV-2, foti mós amostra husi membru familia nain 3 ne’ebé akompaña. Husi nai 3 ne’e nain 2 pozitivu”, deklara Rui liuhusi karta komunikadu ne’ebé www.tempotimor.com asesu iha loron tersa (12/04).
Rui mós aproveita informa hikas ba públiku katak iha Munisipiu Dili rejista óbitu 1 tan, iha loron 12 fulan-abril 2021. Maibé, seidauk iha konkordánsia entre familia ho autoridade Estadu nian kona-ba funeral ba mate-isin.
Eis Primeiru Ministru ne’e fó sai kona-ba Istória klinika pasiente/matebian mane idade 44 anos, pozitivu SARS-CoV-2 iha loron 11 fulan-abril 2021 (foti amostra iha loron 11 fulan-abril 2021, iha Emerjénsia HNGV).
Matebian hela iha Komoro, Dili. Ambulánsia foti nia husi uma, to’o iha emerjénsia iha 18H11, hatudu kondisaun sonolentu, rán sai husi inus, no dada I’is susar.
Husi ezame fiziku ba sinál vital hetan tensaun arterial 140/80 mmHg, pulsasaun 115X/minutu, frekuénsia respirasaun 32X/minutu, saturasaun Oksijéniu 77%.
Ekipa emerjénsia nian halo primeiru sokorru, hafoin halo ezame diagnóstiku adisionál ho eletrokradiograma & raiu X hirus matan, no to’o iha diagnoze traballu Suspeitu AVC (acidente vasculo cerebral) hemorrajiku.
Tamba mós pozitivu SARS-COV-2, kazu ne’e konsideradu COVID-19 kategoria grave, no ekipa konjunta saúde deside enkamiña ba izolamentu Vera Cruz.
Metebian ninia CT (cycle threshod) iha rezultadu PCR iha loron 11 fulan-abril mak N2 gene 25.1; E gene 24.7. Tanba ne’e, ekipa evakua ba kedas ba izolamentu Vera Cruz. Pasiénte i’is kotu iha 1H21.
Maibé, ninia rezultadu test PCR post-mortem (amostra hasai iha maizoumenus 12H00, dia 12 de Abril de 2021), Pozitivu ho CT (Cycle Threshold) N2 Gene 18.6: E Gene 17.0. Oras 13 hafoin i’is kotu, rezultadu PCR hatudu replikasaun virus aumenta tan iha isin-mate.
Ho faktu ida ne’e konsistente ho koñesimentu sientifiku ne’ebé sai baze atu OMS rekomenda funeral ho protokolu espesial ba kazu óbitu ho virus SARS-CoV-2 iha sira-nia isin, ho objetivu atu prevene labele hadaet tutan ba ema seluk.
Husi ne’e, informa mós katak médiku ida ne’ebé mate-bian nia família sira temi iha vídeo ida ne’ebé viral (Dr Joni), ohin (12/04) teste PCR pozitivu, no rezultadu hatudu katak médiku ne’e mós kontajiadu COVID-19. (*)
