Horta: Ministru ho Deputadu Hotu-hotu Labele Tabele iha Indonezia Featured

Eis Prezidente no Diplomata senior liu iha Republika Demokratika Timor Leste, Dr. Jose Ramos Horta Eis Prezidente no Diplomata senior liu iha Republika Demokratika Timor Leste, Dr. Jose Ramos Horta Foto Tempo Timor

Tempotimor (Dili) - Eis Prezidente Repúblika José Ramos Horta husu ba membru governu no deputadu Timor Leste sira atu labele tabele demais iha Indonezia hodi ba gasta osan iha ne’ebá.

Premiadu Nobel da Paz ne’e dehan, maske relasaun di’ak ho Indonezia nafatin importante, maibé tenke mós hamriik ho kuidadu.

Deklarasaun Horta ne’e relasiona ho esperensia husi kompaña aviasaun husi Indonezia, Garuda, ne’ebé komete krime boot kontra ekonomia Timor Leste.

“Ita haree ona, esperiensia ho garuda ne’e. Ba ha’u krime boot ida ne’ebé Garuda halo kontra ekonomia Timor Leste. Timor tenke haree no sukat didi’ak buat sira ne’e hotu. Tanba saida garuda hakarak aumenta folin (bileti), tanba hakarak oho turista mai Timor Leste, atu oho Timor Leste nia ekonomia.”

“Ne’ebé ita haree relasun di’ak ho Indonezia, maibé tenke haree mós hamriik ain ida iha kotuk oituan, labele buat hotu, ministru hotu, deputadu hotu ba tabele iha Indonezia, ba gasta osan iha Surabaya, Bali, buat sira ne’e hotu,” deklara Ramos Horta iha dadalia ho tempotimor, foin lalais.

Entretantu, kona-ba komitementu Indonezia nian hodi apoiu Timor Leste sai membru ASEAN, Horta dehan, relasaun atu tama ASEAN ne’e importante no Timor Leste iha direitu ba ida ne’e.

Maibé, Horta hatete, nasaun balun kestiona Timor Leste preparadu duni atu sai membru ASEAN ka lae.

“Ezemplu oan ida, Singapura preokupadu, hatete Timor laiha preparasaun, tanba sa?, sira hatete “ami-nia investór maka’as ida, ema ida ne’ebé respeitozu iha ami-nia rai, nia ba Timor tinan 10 resin ona, hakarak halo otel boot ida, imi dudu ba dudu mai, la rezolve problema rai tinan 11 tiha ona”. Prontu sira hatete “imi la preparadu”.”

“Tanba ne’e tenke iha polítika ida ne’ebé loloos, koerente ho investór sira. “Imi hakarak turizmu ka lae?”, sira husu ita. Entaun investór ida hakarak loke investimentu boot ho 500 kuartus, ema ida esperiensia, nia otel boot ida iha Saba, i Timor 11 ona la rezolve ida ne’e,” dehan Horta.

Tuir nia, se problema kiik ida atu halo investimentu ba Timor Leste nia interese rasik la konsege halo desizaun, signifika TL la preparadu duni.

“Entaun sira dehan imi preparadu atu tama duni ASEAN eh, investor ida mai husi rai ASEAN hakarak investe iha imi-nia rai ho $400 miloens dolares, ema ne’e gasta nia tempu ba-mai laiha solusaun.”

Ida ne’e, Horta dehan, sai hanesan prova ida ba nasaun balun hodi kaer no hatete katak Timor Leste la preparadu tama ASEAN,

“Tanba rai ASEAN hotu-hotu fasilita investidór, sira-nia lei ne’e simples, ita lae. Dezafiu boot ida mak ne’e atu tama ASEAN, kazu konkretu,” nia hatete.

 

Rate this item
(5 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com