Projetu rezolusaun governu nian ne'e, aprezenta husi Ministru Defeza, Filomeno da Paixão de Jesus, no hetan ona aprovasaun.
Ministru Prezidensiá Konsellu Ministru, Fidélis Leite Magalhães informa, rekrutamentu ne'e séi realiza tempu tuir mai iha tinan 2021 nia laran.
"Aprova ona, ho alterasaun, projetu rezolusaun governu nian kona-ba efetivu anuál hodi inkopora iha Falintil-Forsa Defeza Timor-Leste iha tinan 2021”, dehan Fidélis liuhusi konferensia impresnsa hafoin reuniaun Konsellu Ministru iha palásiu governu, kinta (08/04).
Ba realizasaun rekrutamentu militár nian ida ba inkoporasaun ba rekruta Mane no Feto hamutuk 600, husi númeru ne'e séi fahe ba komponente tolu.
“Ne'ebé, 240 séi ba komponente Forsa Navál Lijeira, 240 ba komponente Forsa Terrestre nian, no 120 ba unidade sira seluk”, esklarese.
Rekrutamentu ne'e, depende ba situasaun surtu Covid-19 nian tempu tuir mai, maibé seidauk defini loron no fulan atu realiza.
“Tempu tuir mai depende ba situasaun Covid-19 nian, no kalamidade ne'e, F-FDTL sei hahú rekrutamentu, ne'e mak ohin rezolusaun hatur”, dehan nia.(*)