Kondisaun ne'ebé Ministra hasoru relasiona ho Konselleiru Máximu partidu KHUNTO, ne'ebé foin lalais utiliza transporte privadu hodi evakua ba izolamentu tanba infetadu pozitivu Covid-19.
"Sim, diskriminasaun iha ne'ebá tanba regra ne'e aplika iha ne'ebá ba ema hotuhotu maibé iha situasaun balun ne'ebé mak susar ba ita atu foti desizaun, ida ne'e mak naran jestor. Laiha jestor ida ne'ebé kaku ou regra hanesan ne'e tenke la’o hanesan”, dehan Odete iha Parlamentu Nasionál (PN) Dili, kuarta (31/03).
Maske Ministra rasik lakohi halo diskriminasaun ba ema hotuhotu, maibé bainhira iha líder polítiku mak hasoru situasaun hanesan ho Konselleiru Máximu KHUNTO, hanesan Jestor Saúde sei atende diferente ho povu.
"Ha’u la’ós ko’alia de’it ba iha senhor Naimori, nia ema ida ne'ebé mak líder politiku ida, ha’u hakarak dehan atu kompara de’it, se senhor Xanana ou senhor Taur Matan Ruak moras, laiha diferensia entre ita-nia líder pokitiku sira, iha situasaun balun ami hanesan jestor ami foti desizaun balun dala-ruma mós la’ós fasil hanesan ita-boot (Jornalista) sira ko’alia tenke halo tuir hotu regra ita iha, maibé dala-ruma ne'e ita sempre fó nafatin dalan ba iha ita-nia líder sira e líder ne'ebé ita iha la’ós nia (Naimori) deit, ita lahatene covid ne'e atu mosu ba se, se covid ne'e mosu ba Prezidente hanusa?”, dehan Odete.
Komunidade inklui nia rasik iha diferente ho líder sira tanba iha situasaun balun presiza iha konsiderasaun.
Antes ne'e, Konselleiru máximu KHUNTO, rezeita lakohi utiliza ambulansia bainhira ekipa saúde atu evakua husi rezidensia privadu ba fatin izolamentu hafoin pozitivu covid-19. (*)