Deputadu Gabriel Soares hatete, pozisaun CNRT manifesta ninia lamentasaun ba deklarasaun PGR, José da Costa Ximenes iha loron 23 fulan-marsu tinan 2021, ne'ebe la-reflete ninia koñesimentu hanesan majistradu ida, no ses husi korredór juridiku.
"Bankada CNRT lamenta ho deklarasaun Prokuradór Jerál Repúblika José da Costa Ximenes ne’ebé konsidera katak, “notifikasaun ba deputadu sira CNRT nian bele fó iha merkadu ka iha Bankada. Tanba CNRT Konsidera deklarasaun ida ne'e halai ses husi korredór jurídiku nian”, dehan nia liuhusi deklarasaun politika iha PN, kinta (29/03).
Deklarasaun Prokuradór Jerál Repúblika, José da Costa Ximenes hato'o, bele mós minimiza no insulta Parlamentu Nasionál hanesan órgaun soberanu RDTL nian.
Tanba, Deputadu sira halo deklarasaun polítika ho estatutu hanesan Membru Parlamentu nu’udar asaun polítika.
Maibe, Prokuradór Jerál nia protesta hasoru desizaun Tribunal nian, hatudu momoos katak Prokuradór-Jerál minimiza no dezvaloriza Tribunal nia kompeténsia nu’udár órgaun estadu ne’ebé nia desizaun maka’as liu buat hotu.
"Sé Prokuradór Jerál mak kestiona ona desizaun Tribunal nian, oinsá estadu bele obriga povu ki’ik sira atu kumpre desizaun Tribunal nian?”, kestiona nia.
Ho ida ne’e, Deputadu sira husi Bankada CNRT prontu atu hatán ba Tribunal, maibé Bankada CNRT mantein prinsípiu katak defende Konstituisaun no Lei sira.
Bankada CNRT rasik mós deklara sei kontra prosesu sira hotu ne’ebé la tuir dalan legál, aleinde loron segunda (29/03), CNRT manifesta ninia lamentasaun no preokupasaun hodi kontra deklarasaun emosionál no frustrasaun husi PGR. (*)