Tanba, iha ona proposta lei ida kona-ba, bainhira sidadaun ida ninia kartaun eleitoral lakon liu dala-tolu ka renova dala-haat sei taxa hafoin Sekretariadu Tékniku Administrasaun Eleitorál (STAE) emite kartaun foun.

"Ne'e, foin proposta lei aprova iha Konsellu Ministru, agora hein atu haruka ba iha Parlamentu Nasionál, prontu sidadaun sira ne'ebé mak kartaun eleitoral, STAE emite dala ida, dala rua, dala tolu, mas kuandu liu dala tolu ona tenke iha kompensasaun, sé mak hakarak ba emite fali ne'e, tenke selu orsan balun para STAE bele produz fali kartaun”, dehan nia hafoin reuniaun Konsellu Ministru iha edifísiu Ministériu Finansas Aitarak-laran, kuarta (24/03).

Sansaun ne'e, ho hanoin ida atu motiva no eduka sidadaun hotu atu kuidadu ida-idak ninia kartaun sira ne’ebé konsidera importante.

"Ida ne'e mak ita presiza eduka ita-nia ema sira, para iha responsablidade kaer kartaun sira wainhira hetan ona kartaun eleitoral, atu ema labele halo lakon kartaun eleitoral arbiru de'it”, haktenik nia.

Kona-ba bainhira kartaun eleitoral lakon ka estraga liu dala tolu, atu halo foun fali selu ho osan montate hira sidauk klaru.

Antes ne'e, iha loron 10 fulan-marsu tinan 2021, Konsellu Ministru aprova ona proposta Lei alterasaun dahuluk ba Lei númeru 6/2016, loron 25 fulan-maiu, kona-ba Lei resenseamentu eleitorál nian, ne’ebé aprezenta husi Ministru Administrasaun Estatál, Miguel Pereira de Carvalho.

Ho alterasaun ida-ne’e, ema ne’ebé ninia kartaun eleitorál lakon ka estraga dala tolu ka liu sei selu taxa ida bainhira trata kartaun foun. (*)