Vise-Prezidente Komisaun A Trata asuntu Justisa no Konstituisionál Parlamentu Nasionál (PN), Deputadu Francisco de Vasconselos, hateten governu daualu seidauk propoin no aprezenta proposta alterasaun ba lei pensaun vitalísia.

Nia haktuir governu seidauk lori proposta altersaun lei ne'e tanba governu sei iha faze atu halo altersaun ba lei organizasun baze administrasaun públika nian, no lei kona-ba orsamentu jestaun finanseira, inklui lei kona-ba rejime jurídiku no arbitrajen voluntária.

Nia hateten, bainhira Governu prepara ona proposta alterasaun aprezenta ba Parlamentu Nasional, maka deputadu sira sei tau iha ajenda atu deskuti.

"Governu haruka mai debate, tanba ne'e governu halakon duni lei ne'e, ne'ebé haruka mai mak ami deskuti," dehan nia ba www.tempotimor.com iha Parlamentu Nasionál, segunda (8/2).

Deputadu Bankada PLP ne'e subliña, atu altera governu sei implementa uluk rejime kontribuitivu, ne'ebé foin daudaun governu liuhosi Ministériu Solidariedade Sosiál no Inkluzaun (MSSI) halo ona audiénsia ho komisaun A nune'e atu prosede ba implementasaun rejime kontribuitivu depois maka halo aletrasaun ba lei pensaun vitalísia ne'e.

"Tanba ne'e mak aban bainrua sira sei halo alterasaun, mais altersaun seidauk lori mai,"dehan nia.

Entretantu, durante ne'e  lei pensaun vitalísia sai istrumentu politika ba kada partidu politiku sira iha tempu kampania maibe alterasaun susar akontese.(*)