Rezultadu husi Platafofma Entendimentu ne'ebé asina husi Sekretáriu Jerál FRETILIN Mari Alkatiri no Prezidente PLP atuál Primeiru Ministru Taur Matan Ruak, halo Partdu Kmanek Haburas Unidade Nacional Timor Oan 'soe' hela CNRT iha momentu forma koligasaun foun.
Haree ba konfigurasaun polítika ne'e halo PD ho kadeira lima iha Parlamentu Nasionál, deside apoia kualkér inisiativa governu nian.
Nia informa, sorumutu ho Primeiru Ministru (PM), Taur Matan Ruak ko'alia kona-ba tau forsa hamutuk hodi lori estadu Timor-Leste ba oin.
"Primeiru hanoin ne'e iha kontestu tinan foun ho Natál nian, ne'ebé ami hakarak felisita ba Primeiru Ministru ba governu tomak santu Natál ho tinan foun no mós ko'alia kona-ba saida mak importante ba estadu ba tinan 2021, buat balun ne'ebé mak liu ona, agora ita tenke tau ita- nia enérjia, tau forsa hamutuk para oinsá nafatin asegura ita-nia rai no fó garantia estabilidade ba ita-nia povu, no ba ita-nia rain", dehan Asanami hafoin sorumutu ho Primeiru Ministru, Taur Matan Ruak iha Palásiu Governu, Kuarta (06/01).
Nia akresenta, PD kaer nafatin prinsípiu katak, maubere oan prontu serví, tanba ne'e mak hatudu tiha ona iha Parlamentu Nasional hodi fo votu a-favór ba kualkér programa husi oitavu governu nian.
"Ami-nia komitmentu ne'ebé fo apoiu, ami haree katak, situasaun ida ke defísil, povu mos iha situasaun defísil, krize globál ida kona-ba Covid-19, PD mantein ho nia prinsípiu ida hakarak hamutuk para hasoru krize ida-ne'e, nomos atu hakotu impase polítiku, normaliza funsionamentu instituisaun demokrátiku sira, normaliza ekonomia maske Ita hasoru situasaun defísil ne'ebé ke ekonomia sidauk la'o normál, maibé PD kontribui, PD fó apoiu ba situasaun sira hanesan ne'e", Nia esplika
"Ita la deskuti kona-ba ida-ne'e, mas ami atu dehan katak, PD prontu fó apoiu para iha situasaun povu defísil ne'e, PD sempre ho lema ida, PD ba estadu, lia-fuan ne'ebé ami sempre temi mós maka ba o Timor maubere oan prontu serví entaun PD hatudu tiha ona iha Parlamentu, mantein nafatin iha 2021 ate ba oin", nia dehan
Nia hatutan, problema boot ba programa governu nian mak iha Parlamentu Nasional, maibé PD kuandu firmi ona, estadu tenke ba oin.
"Problema boot ba programa governu ou orsamentu ne'e kan iha Parlamentu, entaun sé PD firmi ona iha-ne'ebá saida de'it PD mantein nafatin ho ninia prinsípiu ita hakarak hakotu impase, ita hakarak tau enérjia forsa hamutuk hasoru krizé ne'ebé iha ita-nia oin, ita hakarak garantia ba povu ida- ne'e katak, ita-nia estadu ba oin, ita hakarak Timor-Leste ida ne'ebé di'akliu ba oin PD kontribui", Nia argumenta
Asanami dehan, PD apoia la'ós tanba partidu polítiku, maibé tanba estadu ka nasaun ne'e tenke la'o ba oin, ida-ne'e mak PD nia prinsípiu.
"Meiu mak iha Parlamentu Nasional ne'ebé fó apoiu ona durante ne'e, la'ós foin mak apoiu, iha AMP ida liubá ne'e mós PD fó apoiu tanba la'os partidu polítiku ka la'os tanba governu, apoiu tanba estadu, tanba povu tanba estadu tenke la'o ba oin, ida-ne'e mak PD nia prinsípiu, laiha kompromisiu seluk ida", tenik Nia
Nia hatutan, PD nia kompromisiu mak povu tenke senti seguru, estadu tenke ba oin, tenke normaliza ekonomia nasaun.
PD laiha asuntu ida atu deskuti kona-ba remodelasaun tanba asuntu remodelasaun ne'e Primeiru Ministru mak hatene.
"Ami laiha asuntu ida ne'e par deskuti, ne'e asuntu governu nian, Primeiru Ministru nian, ami-nian mak ne'e, ba povu ba rai ida-ne'e maubere oan prontu serví, ami sempre prontu, ami hakarak garantia katak, rai ida-ne'e povu nian, ukun ne'e só povu de'it mak na'in, povu mak fó para empresta iha de'it tinan lima, tanba ne'e mak laiha razaun seluk ida para ita atu sees-malu, ita atu hirus-malu, tanba ukun ne'e povu nian, hamutuk ita la'o ba oin", Nia hakotu. (*)
