"Ohin, ha'u informa ba señor Primeiru Ministru atu hahú loke kandidatura ba formasaun ba juíz, prokuradór no defensór públiku sira, ida-ne'e ekipa juri iha tiha ona hein atu hasai de'it diploma ministérial para atu nomeia ekipa juri sira- ne'e", Ministru Justisa Manuel Cárceres da Costa, ko'alia hafoin hasoru malu ho PM Taur Matan Ruak, iha Palásiu Governu, kuarta (06/01).

Nia dehan, iha formasaun ne'e, juíz sira sai juri ba kandidatu sira-ne'ebé eskola atu sai juíz, prokuradór sira sai juri ba kandidatu sira- ne'ebé atu sai prokuradór no defensór sira sai juri ba kandidatu sira- ne'ebé hakarak sai defensór públiku iha futuru.

"Ha'u mós ohin informa antesipadamente Primeiru Ministru iha tempu badak, ha'u sei haruka karta mai señor primeiru ministru husu autorizasaun para atu loke vaga tolu-nulu (30) ba iha konservadór no notáriu sira", dehan nia.

Nia hatete, daudaun ne'e konservadór notariadu sira iha de'it ema na'in rua-nulu-resin-ida (21) , tanba ne'e presiza tán na'in tolu-nulu (30) hodi destaka ba iha munisípiu sira hotu no balu iha nasionál.

Nia esplika, atu sai ema notáriu ba konservadór tenke ser tuir uluk formasaun iha Sentru Formasaun Judisiáriu (SFJ) durante tinan-rua to'o ho balu.

Nia hatutan, razaun MJ presiza notáriu konservadór, tanba bazeia ba diploma ministeriál ida kona-ba rejistu sivíl nian ne'ebé antes ne'e nia aprezenta iha Konsellu Ministru.

Nia dehan, iha rejistu sivíl ne'e bainhira atu halo rejistu kazamentu ida, la'ós diretór rejistu notariadu mak halo, maibé tenke ema konservdvadór mak bele halo.

"Ne'ebé tenke ser presiza konservadór no presiza notáriu sira- ne'e para halo, aban-bainrua sé Maromak tulun, lei ka diploma sira-ne'e aprova hotu iha tinan ida-ne'e tanba ita hanoin atu fó ona títulu rai ba sidadaun sira".(*)