Deputada ne’e deklara, ró haksolok ne'ebé la mai to'o agora, ida ne'e autoridade kompetente hahú halo investigasaun, maibé tanba iha autoridade foun RAEOA Arsénio Bano nia tempu hakarak rezolve problema ida ne'e no nia hakarak atu ro haksolok ne'e mai TL.

Tanba ne'e, KHUNTO prontu atu apoia ida ne'e no fó votu afavor ba orsamentu adisionál millaun $14 ba ró haksolok ne'e, maibé bainhira rona dehan ró haksolok la mai iha Timor-Leste, mak KHUNTO hit liman no entrega todan ida ne'e ba Autoridade RAEOA maka responsabiliza.

Olinda hato'o lia hirak ne'e liu husi diskusun espesialidade Orsamentu Jerál Estadu (OJE) 2021 iha plenária Parlamentu Nasionál, Sesta (11/12).

"Ha’u ko’alia kona-ba ró, seluk ha’u la ko’alia, kuandu ró haksolok ne'e la mai Timor, maka ami partidu KHUNTO, laiha responsabilidade, maibé ne'e responsabiliza autoridade REAOA nian. Ami fó ami nia votus, maibé Karik tama kadeia ne'e nia mesak mak tama, labele dehan ha’u mak jenderál be mai dada hotu ha’u ba, ami rua tur hotu iha kadeia ne'e labele," nia dehan.

Kona-ba votus afavor ba alokasun orsamentu ró haksolok ne'e Olinda esplika, ida ne'e KHUNTO sei fó tanba daudaun sira ukun hamutuk hela, liu-liu sira mós mantein prinsípiu no razaun ida maka hakarak Timor ne'e tenke la’o ba oin.

“Tanba ne'e KHUNTO desidi fó votus, maibé ró haksolok ne'e la'ós KHUNTO mak responsabiliza mais ne'e responsabilidade Arsénio Bano nian," Olinda subliña.(*)