Tikete foun ne'e rasik uza hodi halo monitorizasaun ba movimentasaun públiku no bainhira motorista sira vióla kódigu estrada, PNTL sei fó tikete prende.
Komandante Polísia Tránzitu munisípiu Dili, Superintendente Xefi, Domingos Sarmento Gama hateten bainhira komunidade sira tama iha área "cheek point" nian membru tránzitu sira sei prende hodi fó tikete prende ba motorista sira hodi prova katak sira nia motor ka kareta hetan prende husi polísia.
Nia dehan, bainhira vióla ona kódigu estrada, autoridade seguransa sira iha direitu atu fó tikete prende ba sira, hodi la'o tuir prosesu ne'ebé mak iha.
"Tiket prende ida ne'e mós ninia razaun maka atu sira prende de'it. Maibé sira tenke kanaliza mai iha tránzitu liu-liu iha sub seksaun trafic inforceman, foin pasa fali tan nota infrasaun", Superintendente Xefi, Domongos Sarmento Gomes hateten liuhusi konferénsia imprénsa ne'ebé realiza iha Kaikoli, Kinta (26/11).
Nia mós esplika, tikete ne'ebé polísia fó, la'ós atu selu iha dalan, maibé nia funsaun atu uza de'it ba halo aprensaun, depois kanaliza ba Polísia Unidade Tránzitu hodi fó nota infrasaun, hafoin lori ba selu iha Banku.
"Sira passa de'it tikete prende ne'e, maibe kanaliza mai tranzitu Dili mak foin passa nota infrasaun, depois lori ba selu iha banku maka lori fali resibu mai hodi hasai sira nia transporte ne'ebé mak polísia prende", dehan nia.(*)
PUBLISIDADE