Taur afirma, Autoriedade Rejiaun Administrativa Espesiál Oekusse Ambeno (RAEOA) nia hakarak mak iha kontinuasaun ba Ró Ferry Haksolok, maibé depende ba PN.

"Ha'u hanoin diskusaun ne'e sei halo iha PN no PN mak sei deside, katak orsamentu tokon $16.9 ne'e mantein ka sai ne'e depende ba parlamentu. Agora autoriedade RAEOA hakarak prosesu ne'e kontinua la'o ba oin ne'e tenke tau osan, maibé ba PN mak haree took," dehan PM Taur iha Palásiu Prezidensiál bairru-pite, Kinta (26/11).

Entretantu kona-ba prosesu Ró Haksolok nian, Sekretáriu Jerál Partidu Fretilin Marí Alkatiri mós kontinua fó hanoin ba governu oinsa atu lori Ró Haksolok mai Timor-Leste.

"Ha'u loron-loron apoiu governu, ha’u hakarak governu ne’e iha susesu hodi bele hadia povu nia moris, entretantu meiu atu lori Ró Haksolok mai TL ne'e governu mak iha, ha’u fó opiniaun, ha'u fó opiniaun," dehan Alkatiri iha tersa (24/11).

Entretantu dadun ne'e, Prezidente Autoriedade Rejiaun Administrativa Espesiál Oekusse Ambeno (PA-RAEOA) Arsenio Paixão Bano husu tan orsamentu adisionál iha OJE 2021 nian hamutuk tokon $16.9.

Maske nune'e, bankada CNRT iha Parlamentu Nasionál (PN) liuhusi konferénsia imprensa katak, laiha fatin ba RAEOA atu husu tan osan.

"Laiha fatin ba RAEOA atu husu tan osan ba governu sentrál, injeta osan tokon $16.9 iha proposta OJE 2021 nian," dehan deputadu Ricardo Baptista.(*)