PM Taur hateten lia hirak ne’e iha diskursu serimónia posse ba membru KNDJ iha edifísiu Ministériu Finansas, Segunda (16/11).
PM Taur konsidera, tomada de posse ida ne'e, marka tan dala ida husi esforsu governu anteriór sira nian atu enkuádra foin sa'e sira ba prosesu dezenvolvimentu nasionál.
Xefe governu afirma, KNDJ estabelese ho Dekretu-Lei N.°27/2016, 31 de Agostu, hodi defini natureza órgaun juventude, tanba KNDJ hanesan órgaun akonsellamentu atu koordena ho instituisaun públiku no privadu sira atu buka integra joven sira iha prosesu dezenvolvimentu nasionál.
"Iha dekretu-lei N.°27/2016, 31 de Agostu, ne'e difini natureza órgaun juventude KNDJ hanesan órgaun akonsellamentu no kordenasaun esforsu instituisoens públikus no privadas sira-nian, par oinsá buka dalan ou buka oportunidade par integra joven sira ba iha prosesu dezenvolvimentu laran" Taur hateten.
Tuir PM, servisu ne'e la'ós kamaan, tanba sei halo estudu atu identifika dezafiu ne'ebé difikulta joventude sira, hodi integra iha prosesu dezenvolvimentu nasionál.
"Ne'e la'ós servisu kamaan ne'e todan, ida seluk mak buka oportunidade, identifika oportunidade, iha ita-nia rain setór privadu ho setór sira seluk dezenvolvimentu nian ké presiza joven sira tama, presiza kontribuisaun joven sira nian," PM Taur esplika.
Tanba ne'e, KNDJ sei halo koordenasaun ho instituisaun públiku no privadu sira, no mós sosiedade sivíl, nune'e kontribui enkuádra foin sa'e sira ba oportunidade ne'ebé nasaun iha.
PM Taur promete, sei akompaña nafatin servisu KNDJ nian, maske tutela iha Sekretáriu Estadu Juventude Desportu (SEJD).
Entretantu, mandatu ba membru KNDJ na'in 17 ne'ebé hetan pose, durante tinan 4, no membru KNDJ ne'e mai husi liña ministériu hotu.(*)
PUBLISIDADE