“Ita tenke halo diversifikasaun, katak ita tenke adapta ho situasaun ne’ebé mak iha, tanba ne'e mak agora ami halo hela servisu maka'as nune’e iha 2021 dijitaliza duni RTTL.EP”, Francisco Martins da Costa Pereira Jerónimo hateten lia hirak ne’e, bainhira hala'o audiénsia públika ho deputadu husi Komisaun A iha sala konferénsia PN, segunda (09/11).
Nia hateten, oras ne'e dadaun kooperasaun entre governu Timor-Leste ho Xína halo hela servisu maka'as kona-ba oinsá maka atu dizitaliza RTTL.EP, tanba dijitalizasaun ne’e governu hahú ona halo ba pilotu, iha torre rua ne'ebé harii iha timor, ida iha Kutulau, ida iha Fatuahi ho ninia sentrál ida mak harii iha Kaikoli.
“Ida ne'e nia objetivu atu dizitaliza iha 2021, tanba torre sira ne'e hari'i hotu ona montajen to'o ona 97%, tuir informasaun ne'ebé ohin ha'u simu husi tékniku sira ne'ebé mak mai, hela de'it 3%. Bainhira sira ne'e remata, ha’u hanoin iha fulan ne’e remata, entaun dezembru ita koko atu tau hodi halo inagurasaun”, nia hateten.
Iha tinan 2021, governu mós sei halo instalasaun ba Sheet book ka antenna rihun 30, ba iha área sira hanesan Likísá, Maliana, Aileu, Ermera, tama to’o Díli ba Hera, Metinaru no inklui Manatutu.
“Tanba depende ba torre rua ne'ebé maka agora iha ne'e, bainhira tau mikro F ne'e iha ne'ebá, sira bele atinje iha fatin ne'ebé de'it”, nia hakotu.