Tuir observasaun ne’ebé Vise-MI halo vidru postu polisia balun rahun no Air Conditioner (AC) barak aat tanba la kuidadu, liuliu AC dala ruma loke durante oras 24.

"Husu ba komandu jerál atu kuidadu fatin ne'e para labele estraga hanesan fatin seluk," dehan António, iha Komandu Jerál PNTL Kaikoli, Tersa (29/9).

Governante ne'e mós dehan, governu gasta osan, liuhusi Sekretáriu Estadu Formasaun Profesionál no Empregu (SEFOPE) estabelese ona postu PNTL nian iha sidade Dili barak mak estragu.

"La'ós dehan katak ita tenke dun malu sala, mas ha'u hanoin ne'e tenke bolu atensaun ba ita para kuidadu. Vidru sira rahun hotu, AC sira kuandu loke husi dader to'o kalan la hasai, husik hela hanesan ne'e de'it," tenik nia.

António subliña, atetude sira ne'e la ajuda governu atu poupa osan no halo manutensaun inklui tau matan ba prioridade nian.

"Mas ha'u fiar, ida ne'e tenke sai ona ezemplu ba fatin sira seluk. Tanba iha komandu jeral kedas, entaun haree didi'ak ba, halo manutensaun ba, para labele sai fali hanesan postu tranzitu sira seluk," nia dehan.

Nia afirma, kulpa ne'e la'ós PNTL nian mesak, maibé hotu-hotu nian, entaun hamutuk para hadi'a ita kontinua, laiha buat foun atu halo. (*)