Sekretáriu Konsellu Superiór PNTL, Superintendente Xefe Carlos Almeida Sousa Jerónimo hatete, iha soru-mutu konsellu superiór nian haree liu ba kazu sira ne'ebé atu halo demisaun.
"Iha ne'ebá ami haree liu de'it ba kazu prosesu dixiplinár, entaun iha kazu lima, kazu haat mak halo demisaun, enkuantu kazu ida mak komandante sira fó hotu hanoin katak, haree fali lai," dehan komandante ne'e iha Komandu Jerál PNTL Kaikoli, Sesta (25/9).
Komandante ne'e afirma, kazu ida ne'ebé seidauk halo demisaun ne'e kona-ba kazu ró iha Atabae nian, entaun inspesaun jerál sei haree depois aprezenta hikas proposta ba Konsellu Superiór PNTL nian.
Entretantu, kazu ne'ebé atu halo ona demisaun ba membru sira ne'ebé komete mak devér seriedade.
"Kazu haat ne'e, iha kazu tolu mak kona-ba devér seriedade ka falta no ida seluk mak kazu UPF nian ne'ebé apoiu fali ema balun hodi hakat liu fronteira ho ilegál," nia dehan.
Entretantu membru sira ne'ebé sei hetan demisaun ne'e balun iha postu sarjentu no postu ajente. Tanba ne'e bainhira demisaun ona, sira sai ona sidadaun bai-bain, maibé kuandu sira aprezenta fali rekursu, ne'e direitu maibé hanesan sidadaun bai-bain, la'ós ona polísia.
Alende ne'e, nia mós subliña, alende husi kazu haat ne'e, iha ona kazu 80 resin ne'ebé deside tiha ona. (*)